[305] 7 Evamme sutaṃ . ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme . atha kho bhagavā pubbaṇhasamayaṃ nivāsetvā pattacīvaramādāya sāvatthiṃ piṇḍāya pāvisi . Tena kho pana samayena aggikabhāradvājassa brāhmaṇassa nivesane aggi pajjalito hoti āhutī paggahitā . atha kho bhagavā sāvatthiyaṃ sapadānaṃ piṇḍāya caramāno yena aggikabhāradvājassa brāhmaṇassa nivesanaṃ tenupasaṅkami . addasā kho aggikabhāradvājo brāhmaṇo bhagavantaṃ dūrato va āgacchantaṃ disvāna bhagavantaṃ etadavoca atreva muṇḍaka atreva samaṇaka atreva vasalaka tiṭṭhāhīti. {305.1} Evaṃ vutte bhagavā aggikabhāradvājaṃ brāhmaṇaṃ etadavoca jānāsi pana tvaṃ brāhmaṇa vasalaṃ vā vasalakaraṇe vā dhammeti . na khvāhaṃ bho gotama jānāmi vasalaṃ vā vasalakaraṇe vā dhamme sādhu me bhavaṃ gotamo tathā dhammaṃ desetu yathāhaṃ jāneyyaṃ vasalaṃ vā vasalakaraṇe vā dhammeti . tena hi brāhmaṇa suṇāhi sādhukaṃ manasikarohi bhāsissāmīti . evaṃ bhoti kho aggikabhāradvājo brāhmaṇo bhagavato paccassosi. Bhagavā etadavoca

[306] |306.539| Kodhano upanāhī ca pāpamakkhī ca yo naro Vipannadiṭṭhi māyāvī taṃ jaññā vasalo iti. 1 |306.540| Ekajaṃ vā dvijaṃ vāpi yodha pāṇaṃ vihiṃsati yassa pāṇe dayā natthi taṃ jaññā vasalo iti. 2 |306.541| Yo hanti uparundheti gāmāni nigamāni ca niggāhako samaññāto taṃ jaññā vasalo iti. 3 |306.542| Gāme vā yadi vāraññe yaṃ paresaṃ mamāyitaṃ theyyā adinnaṃ āneti taṃ jaññā vasalo iti. 4 |306.543| Yo have iṇamādāya bhuñjamāno palāyati na hi te iṇamatthīti taṃ jaññā vasalo iti. 5 |306.544| Yo ve kiñcikkhakamyatā panthasmiṃ vajataṃ janaṃ hantā kiñcikkhamādeti taṃ jaññā vasalo iti. 6 |306.545| Yo attahetu parahetu dhanahetu ca yo naro sakkhipuṭṭho musā brūti taṃ jaññā vasalo iti. 7 |306.546| Yo ñātīnaṃ sakhīnaṃ vā dāresu paṭidissati sahasā sampiyena vā taṃ jaññā vasalo iti. 8 |306.547| Yo mātaraṃ vā pitaraṃ vā jiṇṇakaṃ gatayobbanaṃ pahusanto na bharati taṃ jaññā vasalo iti. 9 |306.548| Yo mātaraṃ vā pitaraṃ vā bhātaraṃ bhaginiṃ sasuṃ hanti roseti vācāya taṃ jaññā vasalo iti. 10 |306.549| Yo atthaṃ pucchito santo anatthamanusāsati Po. uparundhati. 3 Ma. adinnamāneti. @Yu. adinnaṃ ādiyati. 4 Ma. sāhasā . 5 Po. sakhiṃ. Paṭicchannena manteti taṃ jaññā vasalo iti. 11 |306.550| Yo katvā pāpakaṃ kammaṃ mā maṃ jaññāti icchati yo paṭicchannakammanto taṃ jaññā vasalo iti. 12 |306.551| Yo ve parakulaṃ gantvā bhutvā ca sucibhojanaṃ āgataṃ nappaṭipūjeti taṃ jaññā vasalo iti. 13 |306.552| Yo brāhmaṇaṃ vā samaṇaṃ vā aññaṃ vāpi vanibbakaṃ musāvādena vañceti taṃ jaññā vasalo iti. 14 |306.553| Yo brāhmaṇaṃ vā samaṇaṃ vā bhattakāle upaṭṭhite roseti vācā na ca deti taṃ jaññā vasalo iti. 15 |306.554| Asataṃ yodha pabrūti mohena paliguṇṭhito kiñcikkhaṃ nijigiṃsāno taṃ jaññā vasalo iti. 16 |306.555| Yo cattānaṃ samukkaṃse pare ca avajānati nihīno sena mānena taṃ jaññā vasalo iti. 17 |306.556| Rosako kadariyo ca pāpiccho maccharī saṭho ahiriko anottappī taṃ jaññā vasalo iti. 18 |306.557| Yo buddhaṃ paribhāsati atha vā tassa sāvakaṃ paribbājakaṃ gahaṭṭhaṃ vā taṃ jaññā vasalo iti. 19 |306.558| Yo ve anarahaṃ santo arahaṃ paṭijānati coro sabrahmake loke eso kho vasalādhamo. 20 |306.559| Ete kho vasalā vuttā mayā ye te pakāsitā. Na jaccā vasalo hoti na jaccā hoti brāhmaṇo kammunā vasalo hoti kammunā hoti brāhmaṇo. |306.560| Tadamināpi jānātha yathā medaṃ nidassanaṃ caṇḍālaputto sopāko mātaṅgo iti vissuto |306.561| so yasapparamappatto mātaṅgo yaṃ sudullabhaṃ āgañchuṃ tassupaṭṭhānaṃ khattiyā brāhmaṇā bahū. |306.562| So devayānaṃ abhiruyha virajaṃ so mahāpathaṃ kāmarāgaṃ virājetvā brahmalokūpago ahu. Na naṃ jāti nivāresi brahmalokūpapattiyā. |306.563| Ajjhāyikakule jātā brāhmaṇā mantabandhavā te ca pāpesu kammesu abhiṇhamupadissare |306.564| diṭṭheva dhamme gārayhā samparāye ca duggati. Na ne jāti nivāreti duggaccā garahāya vā. |306.565| Na jaccā vasalo hoti na jaccā hoti brāhmaṇo kammunā vasalo hoti kammunā hoti brāhmaṇoti.