[377] |377.981| Rājāhamasmi selā (ti bhagavā) dhammarājā anuttaro dhammena cakkaṃ vattemi cakkaṃ appativattiyaṃ. |377.982| Sambuddho paṭijānāsi (iti selo brāhmaṇo) dhammarājā anuttaro dhammena cakkaṃ vattemi iti bhāsasi gotama |377.983| ko nu senāpatī bhoto sāvako satthuranvayo ko te imaṃ anuvatteti dhammacakkaṃ pavattitaṃ. |377.984| Mayā pavattitaṃ cakkaṃ (lesāti bhagavā) dhammacakkaṃ anuttaraṃ sārīputto anuvatteti anujāto tathāgataṃ. |377.985| Abhiññeyyaṃ abhiññātaṃ bhāvetabbañca bhāvitaṃ pahātabbaṃ pahīnamme tasmā buddhosmi brāhmaṇa |377.986| vinayassu mayi kaṅkhaṃ adhimuñcassu brāhmaṇa dullabhaṃ dassanaṃ hoti sambuddhānaṃ abhiṇhaso.

[378] Alattha kho selo brāhmaṇo sapariso bhagavato santike pabbajjaṃ alattha upasampadaṃ . atha kho keṇiyo jaṭilo Tassā rattiyā accayena sake assame paṇītaṃ khādanīyaṃ bhojanīyaṃ paṭiyādāpetvā bhagavato kālaṃ ārocāpesi kālo bho gotama niṭṭhitaṃ bhattanti . atha kho bhagavā pubbaṇhasamayaṃ nivāsetvā pattacīvaramādāya yena keṇiyassa jaṭilassa assamo tenupasaṅkami upasaṅkamitvā paññatte āsane nisīdi saddhiṃ bhikkhusaṅghena. {378.1} Atha kho keṇiyo jaṭilo buddhappamukhaṃ bhikkhusaṅghaṃ paṇītena khādanīyena bhojanīyena sahatthā santappesi sampavāresi . atha kho keṇiyo jaṭilo bhagavantaṃ bhuttāviṃ onītapattapāṇiṃ aññataraṃ nīcaṃ āsanaṃ gahetvā ekamantaṃ nisīdi . ekamantaṃ nisinnaṃ kho keṇiyaṃ jaṭilaṃ bhagavā imāhi gāthāhi anumodi |378.995| aggihutaṃ mukhā yaññā sāvitti chandaso mukhaṃ rājā mukhaṃ manussānaṃ nadīnaṃ sāgaro mukhaṃ. |378.996| Nakkhattānaṃ mukhaṃ cando ādicco tapataṃ mukhaṃ puññamākaṅkhamānānaṃ saṅgho ve yajataṃ mukhanti.