[386] Evaṃ vutte aññataro bhikkhu bhagavantaṃ etadavoca kīvadīghaṃ nu kho bhante padumaniraye āyuppamāṇanti . dīghaṃ kho bhikkhu padumaniraye āyuppamāṇaṃ taṃ na sukaraṃ saṅkhātuṃ ettakāni vassāni iti vā ettakāni vassasatāni iti vā ettakāni vassasahassāni iti vā ettakāni vassasatasahassāni iti vāti . Sakkā pana bhante upamaṃ kātunti. Sakkā bhikkhūti bhagavā avoca {386.213} seyyathāpi bhikkhu vīsatikhāriko kosalako tilavāho tato puriso vassasatassa [3]- vassasahassassa vassasatasahassassa accayena ekamekaṃ tilaṃ uddhareyya khippataraṃ kho so bhikkhu vīsatikhāriko kosalako Tilavāho iminā upakkamena [1]- pariyādānaṃ gaccheyya na tveva eko abbudo nirayo seyyathāpi bhikkhu vīsati abbudā nirayā evameko nirabbudo nirayo seyyathāpi bhikkhu vīsati nirabbudā nirayā evameko ababo nirayo seyyathāpi bhikkhu vīsati ababā nirayā evameko ahaho nirayo seyyathāpi bhikkhu vīsati ahahā nirayā evameko aṭaṭo nirayo seyyathāpi bhikkhu vīsati aṭaṭā nirayā evameko kumudo nirayo seyyathāpi bhikkhu vīsati kumudā nirayā evameko sogandhiko nirayo seyyathāpi bhikkhu vīsati sogandhikā nirayā evameko uppalako nirayo seyyathāpi bhikkhu vīsati uppalakā nirayā evameko puṇḍarīko nirayo seyyathāpi bhikkhu vīsati puṇḍarīkā nirayā evameko padumo nirayo padumaṃ kho pana bhikkhu nirayaṃ kokāliko bhikkhu upapanno sārīputtamoggallānesu cittaṃ āghātetvāti idamavoca bhagavā idaṃ vatvāna sugato athāparaṃ etadavoca satthā

[387] |387.1084| Purisassa hi jātassa kuṭhārī jāyate mukhe yāya chindati attānaṃ bālo dubbhāsitaṃ bhaṇaṃ. |387.1085| Yo nindiyaṃ pasaṃsati taṃ vā nindati yo pasaṃsiyo vicināti mukhena so kaliṃ Kalinā tena sukhaṃ na vindati. |387.1086| Appamatto ayaṃ kali yo akkhesu dhanapparājayo (sabbassāpi sahāpi attanā) ayameva mahattaro kali yo sugatesu manaṃ padosaye. |387.1087| Sataṃ sahassānaṃ nirabbudānaṃ chattiṃsa ca pañca ca abbudāni yamariyagarahī nirayaṃ upeti vācaṃ manañca paṇidhāya pāpakaṃ. |387.1088| Abhūtavādī nirayaṃ upeti yo vāpi katvā na karomīti cāha ubhopi te pecca samā bhavanti nihīnakammā manujā hi parattha. |387.1089| Yo appaduṭṭhassa narassa dussati suddhassa posassa anaṅgaṇassa tameva bālaṃ pacceti pāpaṃ sukhumo rajo paṭivātaṃva khitto. |387.1090| Yo lobhaguṇe anuyutto so vacasā paribhāsati aññe Asaddho kadariyo avadaññū macchari pesuṇiyasmiṃ anuyutto. |387.1091| Mukhadugga vibhūtamanariya bhūnahata pāpaka dukkatakāri purisanta kali avajāte mā bahubhāṇidha nerayikosi. |387.1092| Rajamākirasi ahitāya sante garahasi kibbissakārī bahūni [6]- duccaritāni caritvā gacchasi kho papataṃ cirarattaṃ. |387.1093| Na hi nassati kassaci kammaṃ eti ha taṃ labhateva suvāmi dukkhaṃ mando paraloke attani passati kibbissakārī. |387.1094| Ayosaṅkusamāhataṭṭhānaṃ tiṇhadhāraṃ ayasūlamupeti atha tattaṃ ayoguḷasannibhaṃ bhojanamatthi tathā paṭirūpaṃ. |387.1095| Na hi vaggu vadanti vadantā nābhijavanti na tāṇamupenti Aṅgāre santhate senti agginisamaṃ pajjalitaṃ pavisanti . |387.1096| Jālena ca onahiyānā tattha hananti ayomayakūṭehi andhaṃ va timisamāyanti taṃ vitataṃ [3]- yathā mahikāyo. |387.1097| Atha lohamayaṃ pana kumbhiṃ agginisamaṃ pajjalitaṃ pavisanti paccanti hi tāsu cirarattaṃ agginisamāsu samuppilavāsā . |387.1098| Atha pubbalohitamisse tattha kiṃ paccati kibbissakārī yaṃ yandisataṃ adhiseti tattha kilissati samphussamāno. |387.1099| Puḷavāvasathe salilasmiṃ tattha kiṃ paccati kibbissakārī gantuṃ na hi tīramapatthi sabbasamā hi samantakapallā . |387.1100| Asipattavanaṃ pana tiṇhaṃ taṃ pavisanti samucchinnagattā Jivhaṃ baḷisena gahetvā āracayāracayā vihananti . |387.1101| Atha vettaraṇiṃ pana duggaṃ tiṇhadhāraṃ khuradhāramupenti tattha mandā papatanti pāpakārā pāpāni katvā . |387.1102| Khādanti hi tattha rudante sāmā sabalā kākolagaṇā ca soṇā siṅgālā paṭigijjhā kulalā vāyasā ca vitudanti. |387.1103| Kicchā vatāyaṃ idha vutti yaṃ jano passati kibbissakārī tasmā idha jīvitasese kiccakaro siyā naro na ca majje . |387.1104| Te gaṇitā vidūhi tilavāhā ye padume niraye upanītā nahutāni hi koṭiyo pañca bhavanti dvādasa koṭisatāni punaññā . |387.1105| Yāva dukkhā nirayā idha vuttā tatthapi tāva ciraṃ vasitabbaṃ Tasmā sucipesalasādhuguṇesu vācaṃ manaṃ pakataṃ parirakkheti. Kokālikasuttaṃ dasamaṃ. ---------