[64] 10 Evamme sutaṃ . ekaṃ samayaṃ bhagavā anupiyāyaṃ viharati ambavane . tena kho pana samayena āyasmā bhaddiyo kāḷigodhāya putto araññagatopi rukkhamūlagatopi suññāgāragatopi abhikkhaṇaṃ udānaṃ udānesi aho sukhaṃ aho sukhanti . assosuṃ kho sambahulā bhikkhū āyasmato bhaddiyassa kāḷigodhāya puttassa araññagatassapi rukkhamūlagatassapi suññāgāragatassapi abhikkhaṇaṃ udānaṃ udānentassa aho sukhaṃ aho sukhanti . sutvāna tesaṃ etadahosi nissaṃsayaṃ kho āvuso āyasmā bhaddiyo kāḷigodhāya putto anabhirato brahmacariyaṃ carati yaṃsa pubbe agārikabhūtassa rajjasukhaṃ so tamanussaramāno araññagatopi rukkhamūlagatopi Suññāgāragatopi abhikkhaṇaṃ udānaṃ udānesi aho sukhaṃ aho sukhanti . atha kho sambahulā bhikkhū yena bhagavā tenupasaṅkamiṃsu upasaṅkamitvā bhagavantaṃ abhivādetvā ekamantaṃ nisīdiṃsu . ekamantaṃ nisinnā kho te bhikkhū bhagavantaṃ etadavocuṃ āyasmā bhante bhaddiyo kāḷigodhāya putto araññagatopi rukkhamūlagatopi suññāgāragatopi abhikkhaṇaṃ udānaṃ udānesi aho sukhaṃ aho sukhanti nissaṃsayaṃ kho bhaddiyo kāḷigodhāya putto anabhirato .pe. Aho sukhanti.

[65] Atha kho bhagavā aññataraṃ bhikkhuṃ āmantesi ehi tvaṃ bhikkhu mama vacanena bhaddiyaṃ bhikkhuṃ āmantehi satthā taṃ āvuso bhaddiya āmantetīti . evaṃ bhanteti kho so bhikkhu bhagavato paṭissutvā yenāyasmā bhaddiyo kāḷigodhāya putto tenupasaṅkami upasaṅkamitvā āyasmantaṃ bhaddiyaṃ kāḷigodhāya puttaṃ etadavoca satthā taṃ āvuso bhaddiya āmantetīti . evamāvusoti kho āyasmā bhaddiyo kāḷigodhāya putto tassa bhikkhuno paṭissutvā yena bhagavā tenupasaṅkami upasaṅkamitvā bhagavantaṃ abhivādetvā ekamantaṃ nisīdi. {65.1} Ekamantaṃ nisinnaṃ kho āyasmantaṃ bhaddiyaṃ kāḷigodhāya puttaṃ bhagavā etadavoca saccaṃ kira tvaṃ bhaddiya araññagatopi rukkhamūlagatopi suññāgāragatopi abhikkhaṇaṃ udānaṃ udānesi aho sukhaṃ aho sukhanti . evaṃ bhanteti . kaṃ pana tvaṃ bhaddiya atthavasaṃ sampassamāno araññagatopi rukkhamūlagatopi Suññāgāragatopi abhikkhaṇaṃ udānaṃ udānesi aho sukhaṃ aho sukhanti . pubbe me bhante agārikabhūtassa rajjasukhaṃ kārentassa antopi antepure rakkhā saṃvidahitā ahosi bahipi antepure rakkhā saṃvidahitā ahosi antopi nagare rakkhā saṃvidahitā ahosi bahipi nagare rakkhā saṃvidahitā ahosi antopi janapade rakkhā saṃvidahitā ahosi bahipi janapade rakkhā saṃvidahitā ahosi. {65.2} So kho ahaṃ bhante evaṃ rakkhito gopito santo bhīto ubbiggo ussaṅkī utrāsī vihāsiṃ etarahi kho panāhaṃ bhante araññagatopi rukkhamūlagatopi suññāgāragatopi ekako abhīto anubbiggo anussaṅkī anutrāsī appossukko pannalomo paradavutto migabhūtena cetasā viharāmi. Imaṃ kho ahaṃ bhante atthavasaṃ sampassamāno araññagatopi rukkhamūlagatopi suññāgāragatopi abhikkhaṇaṃ udānaṃ udānesiṃ aho sukhaṃ aho sukhanti . atha kho bhagavā etamatthaṃ viditvā tāyaṃ velāyaṃ imaṃ udānaṃ udānesi yassantarato na santi kopā iti bhavābhavatañca vītivatto taṃ vigatabhayaṃ sukhiṃ asokaṃ devā nānubhavanti dassanāyāti. Dasamaṃ. Muccalindavaggo dutiyo. Tassuddānaṃ muccalindo rājā daṇḍena sakkāro upāsakena ca gabbhinī ekaputto ca suppavāsā visākhā ca kāḷigodhāya bhaddiyoti. -------------