[85] 1 Evamme sutaṃ . Ekaṃ samayaṃ bhagavā cālikāyaṃ viharati cālike pabbate . tena kho pana samayena āyasmā meghiyo bhagavato upaṭṭhāko hoti . atha kho āyasmā meghiyo yena bhagavā tenupasaṅkami upasaṅkamitvā bhagavantaṃ abhivādetvā ekamantaṃ aṭṭhāsi . ekamantaṃ ṭhito kho āyasmā meghiyo bhagavantaṃ etadavoca icchāmahaṃ bhante jantugāme piṇḍāya pavisitunti . yassadāni tvaṃ meghiya kālaṃ maññasīti. {85.1} Atha kho āyasmā meghiyo pubbaṇhasamayaṃ nivāsetvā pattacīvaramādāya jantugāmaṃ piṇḍāya pāvisi . jantugāme piṇḍāya caritvā pacchābhattaṃ piṇḍapātapaṭikkanto yena kimikāḷāya nadiyā tīraṃ tenupasaṅkami upasaṅkamitvā kimikāḷāya nadiyā tīre jaṅghāvihāraṃ anucaṅkamamāno anuvicaramāno addasā kho ambavanaṃ pāsādikaṃ ramaṇīyaṃ disvānassa etadahosi pāsādikaṃ vatidaṃ ambavanaṃ ramaṇīyaṃ alaṃ vatidaṃ kulaputtassa padhānatthikassa padhānāya sace maṃ bhagavā anujāneyya āgaccheyyāhaṃ imaṃ ambavanaṃ padhānāyāti. {85.2} Atha kho āyasmā meghiyo yena bhagavā tenupasaṅkami Upasaṅkamitvā bhagavantaṃ abhivādetvā ekamantaṃ nisīdi . ekamantaṃ nisinno kho āyasmā meghiyo bhagavantaṃ etadavoca idhāhaṃ bhante pubbaṇhasamayaṃ nivāsetvā pattacīvaramādāya jantugāmaṃ piṇḍāya pāvisiṃ jantugāme piṇḍāya caritvā pacchābhattaṃ piṇḍapātapaṭikkanto yena kimikāḷāya nadiyā tīraṃ tenupasaṅkami upasaṅkamitvā kimikāḷāya nadiyā tīre jaṅghāvihāraṃ anucaṅkamamāno anuvicaramāno addasaṃ ambavanaṃ pāsādikaṃ ramaṇīyaṃ disvāna me etadahosi pāsādikaṃ vatidaṃ ambavanaṃ ramaṇīyaṃ alaṃ vatidaṃ kulaputtassa padhānatthikassa padhānāya sace maṃ bhagavā anujāneyya āgaccheyyāhaṃ imaṃ ambavanaṃ padhānāyāti sace maṃ bhante bhagavā anujānāti gaccheyyāhaṃ [1]- ambavanaṃ padhānāyāti.

[86] Evaṃ vutte bhagavā āyasmantaṃ meghiyaṃ etadavoca āgamehi tāva meghiya ekakomhi tāva yāva aññopi koci bhikkhu āgacchatīti . dutiyampi kho āyasmā meghiyo bhagavantaṃ etadavoca bhagavato bhante natthi kiñci uttariṃ karaṇīyaṃ natthi katassa vā paṭicayo mayhaṃ kho pana bhante atthi uttariṃ karaṇīyaṃ atthi katassa paṭicayo sace maṃ bhante bhagavā anujānāti gaccheyyāhaṃ taṃ ambavanaṃ padhānāyāti . dutiyampi kho bhagavā āyasmantaṃ meghiyaṃ etadavoca āgamehi tāva meghiya ekakomhi tāva yāva aññopi koci bhikkhu āgacchatīti . tatiyampi kho āyasmā meghiyo Bhagavantaṃ etadavoca bhagavato bhante natthi kiñci uttariṃ karaṇīyaṃ natthikatassa vā paṭicayo mayhaṃ kho pana bhante atthi uttariṃ karaṇīyaṃ atthi katassa vā paṭicayo sace maṃ bhagavā anujānāti gaccheyyāhaṃ taṃ ambavanaṃ padhānāyāti . padhānanti kho meghiya vadamānaṃ kintivadeyyāma yassadāni tvaṃ meghiya kālaṃ maññasīti.