[93] 4 Evamme sutaṃ . ekaṃ samayaṃ bhagavā rājagahe viharati veḷuvane kalandakanivāpe . tena kho pana samayena āyasmā ca sārīputto āyasmā ca mahāmoggallāno kapotakandarāyaṃ viharanti . tena kho pana samayena āyasmā sārīputto juṇhāya rattiyā navoropitehi kesehi abbhokāse nisinno hoti aññataraṃ samādhiṃ samāpajjitvā.

[94] Tena kho pana samayena dve yakkhā sahāyakā uttarāya disāya dakkhiṇadisaṃ gacchanti kenacideva karaṇīyena . addasaṃsu kho te yakkhā āyasmantaṃ sārīputtaṃ juṇhāya rattiyā navoropitehi kesehi abbhokāse nisinnaṃ disvāna eko yakkho dutiyaṃ yakkhaṃ Etadavoca paṭibhāti maṃ samma imassa samaṇassa sīse pahāraṃ dātunti. Evaṃ vutte so yakkho taṃ yakkhaṃ etadavoca alaṃ samma mā samaṇaṃ āsādesi uḷāro so samma samaṇo mahiddhiko mahānubhāvoti. {94.1} Dutiyampi kho so yakkho taṃ yakkhaṃ etadavoca paṭibhāti maṃ samma imassa samaṇassa sīse pahāraṃ dātunti . dutiyampi kho so yakkho taṃ yakkhaṃ etadavoca alaṃ samma mā samaṇaṃ āsādesi uḷāro so samma samaṇo mahiddhiko mahānubhāvoti . tatiyampi kho so yakkho taṃ yakkhaṃ etadavoca paṭibhāti maṃ samma imassa samaṇassa sīse pahāraṃ dātunti. {94.2} Tatiyampi kho so yakkho taṃ yakkhaṃ etadavoca alaṃ samma mā samaṇaṃ āsādesi uḷāro so samma samaṇo mahiddhiko mahānubhāvoti. Atha kho so yakkho taṃ yakkhaṃ anādayitvā āyasmato sārīputtattherassa sīse pahāraṃ adāsi . [2]- api tena pahārena sattaratanaṃ vā aṭṭharatanaṃ vā nāgaṃ osādeyya mahantaṃ vā pabbatakūṭaṃ padāleyya . atha ca pana so yakkho ḍayhāmīti vatvā tattheva mahānirayaṃ apatāsi .

[95] Addasā kho āyasmā mahāmoggallāno dibbena cakkhunā visuddhena atikkantamānusakena tena yakkhena āyasmato sārīputtassa sīse pahāraṃ diyamānaṃ disvāna yenāyasmā sārīputto tenupasaṅkami upasaṅkamitvā āyasmantaṃ sārīputtaṃ etadavoca kacci te āvuso khamanīyaṃ kacci yāpanīyaṃ kacci na kiñci Dukkhanti khamanīyaṃ me āvuso moggallāna yāpanīyaṃ me āvuso moggallāna api ca me sīse thokaṃ dukkhanti. {95.1} Acchariyaṃ āvuso sārīputta abbhūtaṃ āvuso sārīputta yaṃ mahiddhiko āyasmā sārīputto mahānubhāvo idha te āvuso sārīputta aññataro yakkho sīse pahāraṃ adāsi tāva mahāpahāro ahosi api tena pahārena sattaratanaṃ vā aṭṭharatanaṃ vā nāgaṃ osādeyya mahantaṃ vā pabbatakūṭaṃ vā padāleyyāti . atha panāyasmā sārīputto evamāha khamanīyaṃ me āvuso moggallāna yāpanīyaṃ me āvuso moggallāna api ca me sīse thokaṃ dukkhanti acchariyaṃ āvuso moggallāna abbhūtaṃ āvuso moggallāna yaṃ mahiddhiko āyasmā mahāmoggallāno mahānubhāvo yatra hi nāma yakkhampi passissati mayaṃ panetarahi paṃsupisācakampi na passāmāti.