[113] Atha kho suppabuddho kuṭṭhī diṭṭhadhammo pattadhammo viditadhammo pariyogāḷhadhammo tiṇṇavicikiccho vigatakathaṅkatho vesārajjappatto aparapaccayo satthu sāsane uṭṭhāyāsanā yena bhagavā tenupasaṅkami upasaṅkamitvā bhagavantaṃ abhivādetvā ekamantaṃ nisīdi . ekamantaṃ nisinno kho suppabuddho kuṭṭhī bhagavantaṃ etadavoca abhikkantaṃ bhante abhikkantaṃ bhante seyyathāpi bhante nikkujjitaṃ vā ukkujjeyya paṭicchannaṃ vā vivareyya mūḷhassa vā maggaṃ ācikkheyya andhakāre vā telappajjotaṃ dhāreyya cakkhumanto rūpāni dakkhantīti evamevaṃ bhagavatā anekapariyāyena dhammo pakāsito esāhaṃ bhante bhagavantaṃ saraṇaṃ gacchāmi dhammañca bhikkhusaṅghañca upāsakaṃ maṃ bhagavā dhāretu ajjatagge pāṇupetaṃ saraṇaṃ gatanti . atha kho suppabuddho kuṭṭhī bhagavatā dhammiyā kathāya sandassito samādapito samuttejito sampahaṃsito bhagavato bhāsitaṃ abhinanditvā anumoditvā uṭṭhāyāsanā bhagavantaṃ abhivādetvā Padakkhiṇaṃ katvā pakkāmi . atha kho acirapakkantaṃ suppabuddhaṃ kuṭṭhiṃ gāvī taruṇavacchā adhipātetvā jīvitā voropesi. Atha kho sambahulā bhikkhū yena bhagavā tenupasaṅkamiṃsu upasaṅkamitvā bhagavantaṃ abhivādetvā ekamantaṃ nisīdiṃsu . ekamantaṃ nisinnā kho te bhikkhū bhagavantaṃ etadavocuṃ yo so bhante suppabuddho nāma kuṭṭhī bhagavato dhammiyā kathāya sandassito samādapito samuttejito sampahaṃsito so kālakato tassa kā gati ko abhisamparāyoti . Paṇḍito bhikkhave suppabuddho kuṭṭhī paccapādi dhammassānudhammaṃ na ca maṃ dhammādhikaraṇaṃ vihesesi suppabuddho bhikkhave kuṭṭhī tiṇṇaṃ saññojanānaṃ parikkhayā sotāpanno avinipātadhammo niyato sambodhiparāyanoti.
[114] Evaṃ vutte aññataro bhikkhu bhagavantaṃ etadavoca ko nu kho bhante hetu ko paccayo yena suppabuddho kuṭṭhī manussadaliddo ahosi manussakapaṇo manussavarākoti . bhūtapubbaṃ bhikkhave suppabuddho kuṭṭhī imasmiṃ yeva rājagahe seṭṭhiputto ahosi . so uyyānabhūmiṃ niyyanto addasa tagarasikhiṃ paccekabuddhaṃ nagare piṇḍāya carantaṃ disvānassa etadahosi kvāyaṃ kuṭṭhī vicaratīti niṭṭhuhitvā apabyāmato karitvā pakkāmi . so tassa kammassa vipākena bahūni vassāni bahūni vassasatāni bahūni vassasahassāni bahūni vassasatasahassāni niraye pacittha tasseva kammassa Vipākāvasesena imasmiṃ yeva rājagahe manussadaliddo ahosi manussakapaṇo manussavarāko so tathāgatappaveditaṃ dhammavinayaṃ āgamma saddhaṃ samādayi sīlaṃ samādayi sutaṃ samādayi cāgaṃ samādayi paññaṃ samādayi so tathāgatappaveditaṃ dhammavinayaṃ āgamma saddhaṃ samādayitvā sīlaṃ samādayitvā sutaṃ samādayitvā cāgaṃ samādayitvā paññaṃ samādayitvā kāyassa bhedā parammaraṇā sugatiṃ saggaṃ lokaṃ upapanno devānaṃ tāvatiṃsānaṃ sahabyataṃ so tattha aññe deve atirocati vaṇṇena ceva yasasā cāti . atha kho bhagavā etamatthaṃ viditvā tāyaṃ velāyaṃ imaṃ udānaṃ udānesi cakkhumā visamānīva vijjamāne parakkame paṇḍito jīvalokasmiṃ pāpāni parivajjayeti. Tatiyaṃ.