[91] |91.26| 6 Naggā dubbaṇṇarūpāsi duggandhā pūti vāyasi makkhikāhi parikiṇṇā kā nu tvaṃ idha tiṭṭhasīti. |91.27| Ahaṃ bhadante petīmhi duggatā yamalokikā Pāpakammaṃ karitvāna petalokaṃ ito gatā |91.28| kālena pañca puttāni sāyaṃ pañca punāpare vijāyitvāna khādāmi tepi na honti me alaṃ. |91.29| Pariḍayhati dhūmāyati khudāya hadayaṃ mama pānīyaṃ na labhe pātuṃ passa maṃ byasanaṃ gatanti. |91.30| Kinnu kāyena vācāya manasā dukkaṭaṃ kataṃ kissa kammavipākena puttamaṃsāni khādasīti. |91.31| Sapatī me gabbhinī āsi tassā pāpaṃ acetayiṃ sāhaṃ paduṭṭhamanasā akariṃ gabbhapātanaṃ. |91.32| Tassā dvemāsiko gabbho lohitaññeva pagghari tadassā mātā kupitā mayhaṃ ñātī samānayi sapathañca maṃ akāresi paribhāsāpayi ca maṃ. |91.33| Sāhaṃ ghorañca sapathaṃ musāvādaṃ abhāsiyaṃ puttamaṃsāni khādāmi sacetaṃ pakataṃ mayā. |91.34| Tassa kammavipākena musāvādassa cūbhayaṃ puttamaṃsāni khādāmi pubbalohitamakkhitāti . Pañcaputtakhādikapetavatthu chaṭṭhaṃ.