[95] |95.58| 10 Kā nu antovimānasmiṃ tiṭṭhantī nūpanikkhami upanikkhamassu bhadde passāmi taṃ mahiddhikanti . |95.59| Aṭṭiyāmi harāyāmi naggā nikkhamituṃ bahi kesehamhi paṭicchannā puññaṃ me appakaṃ katanti. |95.60| Handuttarīyaṃ dāmi te imaṃ dussaṃ nivāsaya imaṃ dussaṃ nivāsetvā bahi nikkhama sobhaṇe upanikkhamassu bhadde passāmi taṃ mahiddhikanti . |95.61| Hatthena hatthe te dinnaṃ na mayhaṃ upakappati esetthupāsako saddho sammā sambuddhasāvako |95.62| etaṃ acchādayitvāna mama dakkhiṇamādisa tathāhaṃ sukhitā hessaṃ sabbakāmasamiddhinīti. |95.63| Tañca te nahāpayitvāna vilimpitvāna vāṇijā vatthehacchādayitvāna tassā dakkhiṇamādisuṃ |95.64| samanantarānudiṭṭhe vipāko upapajjatha bhojanacchādanapānīyaṃ dakkhiṇāya idaṃ phalaṃ |95.65| tato suddhā sucivasanā kāsikuttamadhārinī hasantī vimānā nikkhami dakkhiṇāya idaṃ phalanti. |95.66| Sucittarūpaṃ ruciraṃ vimānaṃ te ca bhāsati devate pucchitācikkha kissa kammassidaṃ phalanti. Khalātiyapetavatthu dasamaṃ.