[103] |103.187| 6 Uṭṭhehi kaṇha kiṃ sesi ko attho supanena te yo ca tuyhaṃ sako bhātā hadayaṃ cakkhuñca dakkhiṇaṃ tassa vātā balīyanti ghaṭo jappati kesavāti. |103.188| Tassa taṃ vacanaṃ sutvā rohiṇeyyassa kesavo taramānarūpo vuṭṭhāsi bhātu sokena addhitoti. |103.189| Kiṃ nu ummattarūpova kevalaṃ dvārakaṃ imaṃ saso sasoti lapasi kīdisaṃ sasamicchasi |103.190| sovaṇṇamayaṃ maṇimayaṃ lohamayaṃ atha rūpiyamayaṃ saṅkhasilāpavāḷamayaṃ kārayissāmi te sasaṃ |103.191| santi aññepi sasakā araññavanagocarā tepi te ānayissāmi kīdisaṃ sasamicchasīti. |103.192| Nāhaṃ me te sase icche ye sasā paṭhavīnissitā candato sasamicchāmi taṃ me ohara kesavāti. |103.193| So nūna madhuraṃ ñāti jīvitaṃ vijahissasi apatthayaṃ patthayasi candato sasamicchasīti. |103.194| Evañce kaṇha jānāsi yathaññamanusasāsi Kasmā pure mataṃ puttaṃ ajjāpi manusocasi. |103.195| Na taṃ labbhā manussena amanussena vā pana jāto me māmarī putto kuto labbhā alabbhiyaṃ |103.196| na mantā mūlabhesajjā osathehi dhanena vā sakkā ānayituṃ kaṇha yaṃ petamanusocasi. |103.197| Mahaddhanā mahābhogā raṭṭhavantopi khattiyā pahūtadhanadhaññāse tepi no ajarāmarā. |103.198| Khattiyā brāhmaṇā vessā suddā caṇḍālapukkusā ete caññe ca jātiyā tepi no ajarāmarā. |103.199| Ye mantaṃ parivattenti chaḷaṅgaṃ brahmacintitaṃ ete caññe ca vijjāya tepi no ajarāmarā. |103.200| Isayo vāpi ye santā saññatattā tapassino sarīraṃ tepi kālena vijahanti tapassino. |103.201| Bhāvitattā arahanto katakiccā anāsavā nikkhipanti imaṃ dehaṃ puññapāpaparikkhayāti. |103.202| Ādittaṃ vata maṃ santaṃ ghatasittaṃva pāvakaṃ vārinā viya osiñcaṃ sabbaṃ nibbāpaye daraṃ. |103.203| Abbūḷhi vata me sallaṃ sokaṃ hadayanissitaṃ yo me sokaparetassa puttasokaṃ apānudi Na socāmi na rodāmi tava sutvāna bhāsitaṃ |103.205| evaṃ karonti sappaññā ye honti anukampakā nivattayanti sokamhā ghaṭo jeṭṭhaṃva bhātaraṃ |103.206| yassa etādisā honti amaccā paricārikā subhāsitena anevanti ghaṭo jeṭṭhaṃva bhātaranti. Kaṇhapetavatthu chaṭṭhaṃ.