[113] |113.422| 3 Veḷuriyatthambhaṃ ruciraṃ pabhassaraṃ vimānamāruyha anekacittaṃ tatthacchasi devi mahānubhāve pathaddhani paṇṇaraseva cando. |113.423| Vaṇṇo ca te kanakassa sannibho uttamarūpo bhusadassaneyyo pallaṅkaseṭṭhe atule nisinnā ekā tuvaṃ natthi tuyhaṃ sāmiko. |113.424| Imā ca te pokkharaññā samantato pahūtamāsā bahupuṇḍarīkā sovaṇṇacuṇṇehi samantamotatā na tattha paṅko paṇṇako ca vijjati. |113.425| Haṃsāpime dassanīyā manoramā udakasmiṃ anupariyanti sabbadā samayya vaggūpanadanti sabbe bindussarā dundubhīnaṃ va ghoso. |113.426| Daddallamānā yasasā yasassinī nāvāya ca tvaṃ avalamba tiṭṭhasi Āḷārapamhe hasite piyaṃvade sabbaṅgakalyāṇi bhusaṃ virocasi. |113.427| Idaṃ vimānaṃ virajaṃ sameṭṭhitaṃ uyyānavanaṃ ratinandavaḍḍhanaṃ icchāmi te nāri anomadassane tayā saha nandane idha moditunti. |113.428| Karohi kammaṃ idha vedanīyaṃ cittañca te idha nitañca hotu katvāna kammaṃ idha modanīyaṃ evaṃ mamaṃ lacchasi kāmakāmininti. |113.429| Sādhūti so tassā paṭisuṇitvā akāsi kammaṃ tahiṃ vedanīyaṃ katvāna kammaṃ tahiṃ vedanīyaṃ uppajji māṇavo tassā sahabyatanti. Rathakārīpetavatthu tatiyaṃ. Bhāṇavāraṃ dutiyaṃ.