[119] |119.482| 9 Mālī kirīṭī kāyūrī gattā te candanussadā pasannamukhavaṇṇosi suriyavaṇṇova sobhasi. |119.483| Amānusā parisajjā ye te me parivārikā dasa kaññāsahassāni yā temā paricārikā. |119.484| Tā kambukāyūradharā kañcanacelabhūsitā mahānubhāvosi tuvaṃ lomahaṃsanarūpavā. |119.485| Piṭṭhimaṃsāni attano sāmaṃ ukkacca khādasi kinnu kāyena vācāya manasā dukkaṭaṃ kataṃ kissa kammavipākena piṭṭhimaṃsāni attano sāmaṃ ukkacca khādasi. |119.486| Attanohaṃ anatthāya jīvaloke acarissaṃ pesuññamusāvādena nikativañcanāya ca. |119.487| Tatthāhaṃ parisaṃ gantvā saccakāle upaṭṭhite Atthaṃ dhammaṃ nirakatvā adhammamanuvattissaṃ . |119.488| Evaṃ so khādatattānaṃ yo hoti piṭṭhimaṃsiko yathāhaṃ ajja khādāmi piṭṭhimaṃsāni attano. |119.489| Tayidaṃ tayā nārada sāmaṃ diṭṭhaṃ anukampakā ye kusalā vadeyyuṃ mā pesuṇaṃ mā ca musā bhaṇi mā khosi piṭṭhimaṃsiko tuvanti. Kūṭavinicchayakapetavatthu navamaṃ.