[126] |126.654| 6 Sāvatthī nāma nagaraṃ himavantassa passato tatthāsuṃ dve kumārā rājaputtāti me sutaṃ. |126.655| Pamattā rajanīyesu kāmassādābhinandino paccuppanne sukhe giddhā na te passiṃsu nāgataṃ. |126.656| Te puttā ca manussattā paralokaṃ ito gatā te ca ghosenti na dissanto pubbe dukkaṭamattano. |126.657| Bahūsu vata santesu deyyadhamme upaṭṭhite nāsakkhimhā ca attānaṃ parittasotthiṃ kātuṃ sukhāvahaṃ. |126.658| Kiṃ tato pāpakaṃ assa yanno rājakulā cutā upapannā petavisayaṃ khuppipāsāsamappitā. |126.659| Sāmino idha hutvāna honti assāmino tahiṃ maranti khuppipāsāya manussā unnatonatā. |126.660| Evamādīnavaṃ ñatvā issaramānasambhavaṃ Pahāya issaramadaṃ bhave saggagato naro kāyassa bhedā sappañño saggaṃ so upapajjatīti. Kumārapetavatthu chaṭṭhaṃ.