[399] |399.1089| 1 Kadā nuhaṃ pabbatakandarāsu ekākiyo addutiyo vihassaṃ aniccato sabbabhavaṃ vipassaṃ taṃ me idantaṃ nu kadā bhavissati. |399.1090| Kadā nuhaṃ bhinnapaṭandharo muni Kāsāvavattho amamo nirāsayo rāgañca dosañca tatheva mohaṃ hitvā sukhī pavanagato vihassaṃ. |399.1091| Kadā aniccaṃ vadharoganiddhaṃ kāyaṃ imaṃ maccurājassa padūtaṃ vipassamāno vītabhayo vihassaṃ eko vane taṃ nu kadā bhavissati. |399.1092| Kadā nuhaṃ bhayajananiṃ dukkhāvahaṃ taṇhālataṃ bahuvidhānuvattaniṃ paññāmayaṃ tikhiṇamasiṃ gahetvā chetvā vase tampi kadā bhavissati. |399.1093| Kadā nu paññāmayamuggatejaṃ satthaṃ isīnaṃ ahamādayitvā māraṃ sasenaṃ sahasā bhañjissaṃ sīhāsane tannu kadā bhavissati. |399.1094| Kadā nuhaṃ sabbhi samāgamesu diṭṭho bhave dhammagarūhi tādihi yathāvadassīhi jitindriyehi Padhāniyo tannu kadā bhavissati. |399.1095| Kadā nu maṃ tandikhudāpipāsā vātātapā kīṭasiriṃsapā vā nibādhayissanti na taṃ giribbaje attatthiyaṃ tannu kadā bhavissati. |399.1096| Kadā nu kho yaṃ viditaṃ mahesinā cattāri saccāni sududdasāni samāhitatto satimā agacchaṃ paññāya taṃ tannu kadā bhavissati. |399.1097| Kadā nu rūpe amite ca sadde gandhe rase phusitabbe ca dhamme ādittatohaṃ samathehi yutto paññāya dakkhaṃ tadidaṃ kadā me. |399.1098| Kadā nuhaṃ dubbacanena vutto tatonimittaṃ vimano na hessaṃ atho pasaṭṭhopi tatonimittaṃ tuṭṭho na hessaṃ tadidaṃ kadā me. |399.1099| Kadā nu kaṭṭhe ca tiṇe latā ca khandhe imehaṃ amite ca dhamme ajjhatikāneva ca bāhirāni ca Samaṃ tuleyyaṃ tadidaṃ kadā me. |399.1100| Kadā nu maṃ pāvusakālamegho navena toyena sacīvaraṃ vane isippayātamhi pathe vajantaṃ ovassate tannu kadā bhavissati. |399.1101| Kadā mayūrassa sikhaṇḍino vane dijassa sutvā girigabbhare rutaṃ paccuṭṭhahitvā amatassa pattiyā sañcintaye tannu kadā bhavissati. |399.1102| Kadā nu gaṅgaṃ yamunaṃ sarassatiṃ pātālakhittaṃ vaḷavāmukhañca asajjamāno patareyyamiddhiyā vibhiṃsanaṃ taṃ nu kadā bhavissati. |399.1103| Kadā nu nāgova saṅgāmacārī padālaye kāmaguṇesu chandaṃ nibbajjayaṃ sabbasubhaṃ nimittaṃ jhāne yutto tannu kadā bhavissati. |399.1104| Kadā iṇaṭṭova daliddako nidhiṃ ārādhayitvā dhanikehi pīḷito Tuṭṭho bhavissaṃ adhigamma sāsanaṃ mahesino tannu kadā bhavissati. |399.1105| Bahūni vassāni tayāmhi yācito agāravāsena alaṃ nu te idaṃ taṃ dāni maṃ pabbajitaṃ samānaṃ kiṃkāraṇaṃ citta tuvaṃ na yuñjasi. |399.1106| Nanu ahaṃ citta tayāmhi yācito giribbaje citrachadā vihaṅgamā mahindaghosatthanitābhigajjino te taṃ ramissanti vanamhi jhāyinaṃ. |399.1107| Kulamhi mitte ca piye ca ñātake khiḍḍāratiṃ kāmaguṇañca loke sabbaṃ pahāya idamajjhupāgato athopi tvaṃ citta na mayha tussasi. |399.1108| Mameva etaṃ na hitaṃ paresaṃ sannāhakāle paridevitena kiṃ sabbaṃ idaṃ calaṃ iti pekkhamāno abhinikkhamiṃ amataṃ padaṃ jigīsaṃ. |399.1109| Suvuttavādī dvipadānamuttamo mahābhisakko naradammasārathi Cittaṃ calaṃ makkaṭasannibhaṃ iti avītarāgena sudunnivāriyaṃ. |399.1110| Kāmāhi citrā madhurā manoramā aviddasū yattha sitā puthujjanā te dukkhamicchanti punabbhavesino cittena nītā niraye niraṅkatā . |399.1111| Mayūrakoñcābhirudamhi kānane dīpīhi byagghehi purakkhato vasaṃ kāye apekkhaṃ jaha mā padhāraya itissu maṃ citta pure niyuñjasi. |399.1112| Bhāvehi jhānāni ca indriyāni ca balāni bojjhaṅgasamādhibhāvanā tisso ca vijjā phusa buddhasāsane itissu maṃ citta pure niyuñjasi. |399.1113| Bhāvehi maggaṃ amatassa pattiyā niyyānikaṃ sabbadukkhakkhayogadhaṃ aṭṭhaṅgikaṃ sabbakilesasodhanaṃ itissu maṃ citta pure niyuñjasi. |399.1114| Dukkhanti khandhe paṭipassa yoniso Yato ca dukkhaṃ samudeti taṃ jaha idheva dukkhassa karohi antaṃ itissu maṃ citta pure niyuñjasi. |399.1115| Aniccaṃ dukkhanti vipassa yoniso suññaṃ anattāti aghaṃ vadhanti ca manovicāre uparundha cetaso itissu maṃ citta pure niyuñjasi. |399.1116| Muṇḍo virūpo abhisāpamāgato kapālahatthova kulesu bhikkhassu yuñjassu satthu vacane mahesino itissu maṃ citta pure niyuñjasi. |399.1117| Susaṃvutatto visikhantaraṃ caraṃ kulesu kāmesu asaṅgamānaso cando yathā dosinapuṇṇamāsiyā itissu maṃ citta pure niyuñjasi. |399.1118| Āraññiko hoti ca piṇḍapātiko sosāniko hoti ca paṃsukūliko nesajjiko hoti sadā dhute rato itissu maṃ citta pure niyuñjasi. Hatthiṃ pabhinnaṃ viya aṅkusaggaho. |399.1129| Satthā ca me lokamimaṃ adhiṭṭhahi aniccato addhuvato asārato pakkhanda maṃ citta jinassa sāsane tārehi oghā mahatā suduttarā. |399.1130| Na te idaṃ citta yathāpurāṇakaṃ nāhaṃ alaṃ tuyha vase nivattituṃ mahesino pabbajitomhi sāsane na mādisā honti vināsadhārino. |399.1131| Nagā samuddā saritā vasundharā disā catasso vidisā adhodisā sabbe aniccā tibhavā upaddutā kuhiṃ gato citta sukhaṃ ramissasi. |399.1132| Dhī dhī paraṃ kiṃ mama citta kāhasi na te alaṃ citta vasānuvattako na jātu bhastaṃ ubhatomukhaṃ chupe dhiratthu pūraṃ navasotasandaniṃ. |399.1133| Varāhaeṇeyyavigāḷhasevite pabbhārakūṭe pakaṭeva sundare navambunā pāvusasittakānane Tahiṃ guhāgehagato ramissasi. |399.1134| Sunīlagīvā susikhā supekhuṇā sucittapattacchadanā vihaṅgamā sumañjughosatthanitābhigajjino te taṃ ramissanti vanamhi jhāyinaṃ. |399.1135| Vuṭṭhamhi deve caturaṅgule tiṇe sampupphite meghanibhamhi kānane nagantare viṭapisamo sayissaṃ taṃ me mudu hohiti tūlasannibhaṃ. |399.1136| Tathā tu karissāmi yathāpi issaro yaṃ labbhati tenapi hotu me alaṃ taṃ taṃ karissāmi yathā atandito biḷārabhastaṃva yathā sumadditaṃ. |399.1137| Tathā tu karissāmi yathāpi issaro yaṃ labbhati tenapi hoti me alaṃ viriyena taṃ mayha vasānayissaṃ gajaṃva mattaṃ kusalaṅkusaggaho. |399.1138| Tayā sudantena avatthitena hi Hayena yoggācariyova ujjunā pahomi maggaṃ paṭipajjituṃ sivaṃ cittānurakkhīhi sadā nisevitaṃ. |399.1139| Ārammaṇe taṃ balasā nibandhisaṃ nāgaṃva thambhamhi daḷhāya rajjuyā tamme suguttaṃ satiyā subhāvitaṃ anissitaṃ sabbabhavesu hehisi. |399.1140| Paññāya chetvā vipathānusārinaṃ yogena niggayha pathe nivesiya disvā samudayaṃ vibhavañca sambhavaṃ dāyādako hehisi aggavādino. |399.1141| Catubbipallāsavasaṃ adhiṭṭhitaṃ gāmaṇḍalaṃva parinesi citta maṃ nanu saññojanabandhanacchidaṃ saṃsevase kāruṇikaṃ mahāmuniṃ. |399.1142| Migo yathā seri sucittakānane rammaṃ giriṃ pāvisi abbhamālinaṃ anākule tattha nage ramissasi asaṃsayaṃ citta parābhavissasi. Tālapuṭo thero. Uddānaṃ paññāsamhi nipātamhi eko tālapuṭo suci gāthāyo tattha paññāsa puna pañca ca uttarīti. Paññāsanipāto samatto. -----------------