[472] |472.367| 1 Jīvakambavanaṃ rammaṃ gacchantiṃ bhikkhuniṃ subhaṃ dhuttako sannivāresi tamenaṃ abravī subhā. |472.368| Kiṃ te aparādhitaṃ mayā yaṃ maṃ ovadiyānutiṭṭhasi na hi pabbajitāya āvuso puriso samphusanāya kappati. |472.369| Garuke mama satthu sāsane yā sikkhā sugatena desitā parisuddhapadaṃ anaṅgaṇaṃ kiṃ maṃ ovadiyānutiṭṭhasi . |472.370| Āvilacitto anāvilaṃ sarajo vītarajaṃ anaṅgaṇaṃ sabbattha vimuttamānasaṃ kiṃ maṃ ovadiyānutiṭṭhasi . |472.371| Daharā ca apāpikā cāsi kinte pabbajjā karissati nikkhipa kāsāyacīvaraṃ ehi ramāmase supupphite vane. |472.372| Madhurañca pavanti sabbaso kusumarajena samuṭṭhitā dumā paṭhamavasanto sukho utu ehi ramāmase supupphite vane. |472.373| Kusumitasikharā ca pādapā abhigajjantiva māluteritā kā tuyhaṃ rati bhavissati yadi ekā vanamogāhissasi. |472.374| Vāḷamigasaṅghasevitaṃ kuñjaramattakareṇuloḷitaṃ asahāyikā gantumicchasi rahitaṃ bhīsanakaṃ mahāvanaṃ. |472.375| Tapanīyakatāva dhītikā vicarasi cittaratheva accharā Kāsikasukhumehi vagguhi sobhasi nivasanehinopame. |472.376| Ahaṃ tava vasānugo siyaṃ yadi viharemase kānanantare na hi matthi tayā piyataro pāṇo kinnarimandalocane. |472.377| Yadi me vacanaṃ karissasi sukhitā ehi agāramāvasa pāsādanivātavāsinī parikammante karontu nāriyo. |472.378| Kāsikasukhumāni dhārassu abhiropehi ca mālavaṇṇakaṃ kañcanamaṇimuttakaṃ bahuṃ vividhaṃ ābharaṇaṃ karomi te. |472.379| Sudhotarajapacchadaṃ subhaṃ goṇakatūlikasanthataṃ navaṃ abhirūhi sayanaṃ mahārahaṃ candanamaṇḍitaṃ sāragandhikaṃ. |472.380| Uppalaṃ ca udakato ubbhataṃ yathā yaṃ amanussasevitaṃ evaṃ tuvaṃ brahmacārini sakesu aṅgesu jaraṃ gamissasi. |472.381| Kinte idha sārasammataṃ kuṇapapūramhi susānavaḍḍhane bhedanadhamme kaḷevare yaṃ disvā vimano udikkhasi. |472.382| Akkhīni ca turiyāriva kinnariyāriva pabbatantare tava me nayanāni dakkhiya bhiyyo kāmarati pavaḍḍhati. |472.383| Uppalasikharopamāni te vimale hāṭakasannibhe mukhe tava me nayanāni dakkhiya bhiyyo kāmaguṇo pavaḍḍhati. |472.384| Api dūragatā saremhase āyatapamhe visuddhadassane Na hi matthi tayā piyatarā nayanā kinnarimandalocane. |472.385| Apathena payātumicchasi candaṃ kīḷanakaṃ gavesasi sineruṃ laṅghetumicchasi yo tvaṃ buddhasutaṃ patthesi . |472.386| Natthi hi loke sadevake rāgo yatthapi dāni me siyā napi naṃ jānāmi kīriso atha maggena hato samūlako. |472.387| Iṅghāḷakhuyāva ujjhito visapattoriva aggato kato napi naṃ passāmi kīriso atha maggena hato samūlako. |472.388| Yassā siyā apaccavekkhitaṃ satthā vā anusāsito siyā tvaṃ tādisikaṃ palobhaya jānantiṃ so imaṃ vihaññasi. |472.389| Mayhaṃ hi akkuṭṭhavandite sukhadukkhe ca sati upaṭṭhitā saṅkhatamasubhanti jāniya sabbattheva mano na limpati. |472.390| Sāhaṃ sugatassa sāvikā maggaṭṭhaṅgikayānayāyinī uddhaṭasallā anāsavā suññāgāragatā ramāmihaṃ. |472.391| Diṭṭhā hi mayā sucittitā sombhā dārukacillakāni vā tantīhi ca khīlakehi ca vinibaddhā vividhaṃ panaccitā. |472.392| Tamhuddhaṭe tantikhīlake vissaṭṭhe vikale paripakkate avinde khaṇḍaso kate kimhi tattha manaṃ nivesaye. |472.393| Tathūpamaṃ dehakāni maṃ tehi dhammehi vinā na vattanti Dhammehi vinā na vattanti kimhi tattha manaṃ nivesaye. |472.394| Yathā haritālena makkhitaṃ addasa cittikaṃ bhittiyā kataṃ tamhi te viparītadassanaṃ paññā mānusikā niratthikā. |472.395| Māyaṃ viya aggato kataṃ supinanteva suvaṇṇapādapaṃ upadhāvasi andha rittakaṃ janamajjheriva rupparūpakaṃ. |472.396| Vaṭṭaniriva koṭarohitā majjhe bubbuḷakā saassukā pīḷakoḷikā cettha jāyati vividhā cakkhuvidhā va maṇḍitā. |472.397| Upādiya cārudassanā na ca pajjittha alaggamānasā handa te cakkhuṃ harassu taṃ tassa narassa adāsi tāvade. |472.398| Tassa ca viramāsi tāvade rāgo tattha khamāpayi ca naṃ sotthi siyā brahmacārini na puno edisakaṃ bhavissata. |472.399| Āhaniya edisaṃ janaṃ aggiṃ pajjalitaṃva liṅgiya gaṇhissaṃ āsīvisaṃ viya api nu sotthi siyā khamehi no. |472.400| Muttā ca tato sā bhikkhunī agami buddhavarassa santikaṃ passiya varapuññalakkhaṇaṃ cakkhu āsi yathāpurāṇakanti. Subhā jīvakambavanikā. Tiṃsanipāto samatto. ------------