[52] |52.627| 2 Cirappavāsiṃ purisaṃ dūrato sotthimāgataṃ ñātī mittā suhajjā ca abhinandanti āgataṃ |52.628| tatheva katapuññaṃpi asmā lokā paraṃ gataṃ puññāni paṭiggaṇhanti piyaṃ ñātīva āgataṃ |52.629| uṭṭhehi revate supāpadhamme apārutaṃ dvāraṃ adānasīle nessāma taṃ yattha thunanti duggatā samappitā nerayikā dukkhenāti |52.630| iccevaṃ vatvāna yamassa dūtā te dve yakkhā lohitakkhā brahantā paccekabāhāsu gahetvā revatiṃ pakkāmayiṃsu devagaṇassa santike |52.631| ādiccavaṇṇaṃ ruciraṃ pabhassaraṃ byamhaṃ subhaṃ kañcanajālachannaṃ Kassetaṃ ākiṇṇajanaṃ vimānaṃ suriyassa raṃsīriva jotamānaṃ |52.632| nārīgaṇā candanasārānulittā ubhato vimānaṃ upasobhayanti tandissati suriyasamānavaṇṇaṃ ko modati saggappatto vimāneti. |52.633| Bārāṇasiyaṃ nandiyo nāmāsi upāsako amaccharī dānapatī vadaññū tassetaṃ ākiṇṇajanaṃ vimānaṃ suriyassa raṃsīriva jotamānaṃ |52.634| nārīgaṇā candanasārānulittā ubhato vimānaṃ upasobhayanti tandissati suriyasamānavaṇṇaṃ so modati saggappatto vimāne |52.635| nandiyassāhaṃ bhariyā agārinī sabbakulassa issarā bhattuvimāne ramissāmi dānihaṃ na patthaye nirayaṃ dassanāya |52.636| eseva te nirayo supāpadhamme Puññaṃ tayā akataṃ jīvaloke na hi macchariyo rosako pāpadhammo saggūpagānaṃ labhati sahabyataṃ |52.637| kiṃ nu gūthañca muttañca asuci paṭidissati duggandhaṃ kimidaṃ miḷhaṃ kimetaṃ upavāyati |52.638| esa saṃsavako nāma nirayo gambhīro sataporiso yattha vassasahassāni tuvaṃ paccasi revateti. |52.639| Kiṃ nu kāyena vācāya manasā dukkaṭaṃ kataṃ kena saṃsavako laddho nirayo gambhīro sataporiso (iti). |52.640| Samaṇe brāhmaṇe cāpi aññe cāpi vaṇibbake musāvādena vañcesi taṃ pāpaṃ pakataṃ tayā |52.641| tena saṃsavako laddho nirayo gambhīro sataporiso tattha vassasahassāni tuvaṃ paccasi revate |52.642| hatthepi chindanti athopi pāde kaṇṇepi chindanti athopi nāsaṃ athopi kākolagaṇā samecca saṅgamma khādanti viphandamānanti. |52.643| Sādhu kho maṃ paṭinetha kāhāmi kusalaṃ bahuṃ dānena samacariyāya saññamena damena ca yaṃ katvā sukhitā honti na ca pacchānutappareti. Po. vippalapantiñca. Paribhāsikā samaṇabrāhmaṇānaṃ vitathena ca sāmikaṃ vañcayitvā paccāmahaṃ niraye ghorarūpeti. Revativimānaṃ dutiyaṃ.