[53] |53.652| 3 Yo vadataṃ pavaro manujesu sakyamunī bhagavā katakicco pāragato balaviriyasamaṅgī taṃ sugataṃ saraṇatthamupehi |53.653| rāgavirāgamaneñjamasokaṃ dhammasaṅkhatamappaṭikūlaṃ madhuramimaṃ paguṇaṃ suvibhattaṃ dhammamimaṃ saraṇatthamupehi |53.654| yattha ca dinnamahapphalamāhu catūsu sucīsu purisayugesu aṭṭha ca puggaladhammaddasā te saṅghamimaṃ saraṇatthamupehīti . |53.655| Na tathā tapati nabhasmiṃ suriyo cando na bhāsati na phusso yathā tulamidaṃ mahappabhāsaṃ Ko nu tvaṃ tidivāmahimupāgami |53.656| chindati ca raṃsi pabhākarassa sādhikavīsati yojanāni ābhā rattimpi ca yathā divaṃ karoti parisuddhaṃ vimalaṃ subhaṃ vimānaṃ |53.657| bahūpadumavicitrapuṇḍarīkaṃ vokiṇṇaṃ kusumehi nekavicittaṃ arajavirajahemajālacchannaṃ ākāse tapati yathāpi suriyo |53.658| rattakambalapītavāsasāhi agalūpiyaṅgukacandanussadāhi kañcanatanusannibhattacāhi paripūraṅgagaṇaṃva tārakāhi |53.659| naranāriyo bahukettha nekavaṇṇā kusumavibhūsitābharaṇettha sumanā anilapamuñcitā pavanti surabhi tapanīyacittattā suvaṇṇachadanā |53.660| kissa kammassa ayaṃ vipāko kenāsi kammaphalenidhūpapanno Yathā ca te adhigatamidaṃ vimānaṃ tadanurūpaṃ avacāsi iṅgha puṭṭhoti. |53.661| Sayamidha pathe samecca māṇavena satthānusāsi anukampamāno tava ratanavarassa dhammaṃ sutvā karissāmīti ca iti bravittha chatto |53.662| jinapavaraṃ upemi saraṇaṃ dhammañcāpi tatheva bhikkhusaṅghaṃ noti paṭhamaṃ avocāhaṃ bhante pacchā te vacanaṃ tathevakāsiṃ |53.663| mā ca pāṇavadhaṃ vividhamācarassu asuciṃ na hi pāṇesu asaññataṃ avaṇṇayiṃsu sappaññā noti paṭhamaṃ avocāhaṃ bhante pacchā te vacanaṃ tathevakāsiṃ |53.664| mā ca parajanassa rakkhitāyo [2]- parabhariyāyo agamā anariyametaṃ noti paṭhamaṃ avocāhaṃ bhante pacchā te vacanaṃ tathevakāsiṃ |53.665| mā ca vitathaṃ aññathā abhaṇi Na hi musāvādaṃ avaṇṇayiṃsu sappaññā noti paṭhamaṃ avocāhaṃ bhante pacchā te vacanaṃ tathevakāsiṃ |53.666| yena ca purisassa apeti saññā taṃ majjaṃ parivajjayassu sabbaṃ noti paṭhamaṃ avocāhaṃ bhante pacchā te vacanaṃ tathevakāsiṃ |53.667| svāhaṃ idha pañcasikkhā karitvā paṭipajjitvā tathāgatassa dhamme dvepathamagamāsiṃ coramajjhe te maṃ tattha vadhiṃsu bhogahetu |53.668| ettakamidaṃ anussarāmi kusalaṃ tato paraṃ na me vijjati aññaṃ tena sucaritena kammunāhaṃ upapanno tidivesu kāmakāmī |53.669| passa khaṇamuhuttasaññamassa anudhammapaṭipattiyā vipākaṃ jalamiva yasasā pekkhamānā bahukā maṃ pihayanti hīnadhammā |53.670| passa katipayāya desanāya Sugatiñcamhi gato sukhañca patto ye ca te sattañca suṇanti dhammaṃ maññe te amataṃ phusanti khemaṃ |53.671| appakampi kataṃ mahāvipākaṃ vipulaṃ hoti tathāgatassa dhamme passa katapuññatāya chatto obhāseti paṭhaviṃ yathāpi suriyo |53.672| kimidaṃ kusalaṃ kimācarema icceke hi samecca mantayanti te mayaṃ punadeva laddhā mānussattaṃ paṭipannā vicāremu sīlavanto |53.673| bahukāro anukampako ca me satthā iti me sati agamā divādivassa svāhaṃ upagatomhi saccanāmaṃ anukampassu punapi suṇomi dhammaṃ |53.674| yedha pajahanti kāmarāgaṃ bhavarāgānussayañca pahāya mohaṃ na ca te upenti gabbhaseyyaṃ parinibbānagatā hi sītibhūtāti. Chattamāṇavakavimānaṃ tatiyaṃ.