[64] |64.757| 14 Sahassayuttaṃ hayavāhanaṃ subhaṃ āruyhimaṃ sandananekacittaṃ uyyānabhūmiṃ abhito anukkamaṃ purindado bhūtapatīva vāsavo |64.758| sovaṇṇamayā te rathakubbarā ubho phalehi aṃsehi atīva saṅgatā sujātagumbā naravīraniṭṭhitā virocati paṇṇaraseva cando |64.759| suvaṇṇajālāvitato ratho ayaṃ bahūhi nānāratanehi cittito sunandighoso ca subhassaro ca virocati cāmarahatthabāhuhi |64.760| imā ca nābhyo manasāhi nimmitā rathassa pādantaramajjhabhūsitā imā ca nābhyo satarājicittitā sateritā vijjurivappabhāsare Pañcaṅgikaṃ turiyamivappavāditaṃ |64.766| rathassa ghoso apilandhanāni khurassa nādi abhihiṃsanāya ca ghoso suvaggū samitassa suyyati gandhabbaturiyāni vicitrasavane |64.767| rathe ṭhitā tā migamandalocanā āḷārapamhā hasitā piyaṃvadā veḷuriyajālā vinatā tanucchavā sadeva gandhabbasuraggapūjitā |64.768| rattā rattambarapītavāsasā visālanettā abhirattalocanā kulesu jātā sutanū suvimhitā rathe ṭhitā pañjalikā upaṭṭhitā |64.769| tā kambukāyuradharā suvāsasā sumajjhimā ūruthanopapannā vaṭṭaṅguliyo sumukhā sudassanā rathe ṭhitā pañjalikā upaṭṭhitā |64.770| aññāsu veṇīsu sumissakesiyo samaṃ vibhattāhi pabhassarāhi ca Anupubbatā tā tava mānase ratā rathe ṭhitā pañjalikā upaṭṭhitā |64.771| āveḷiniyo padumuppalacchadā alaṅkatā candanasāravositā anupubbatā tā tava mānase ratā rathe ṭhitā pañjalikā upaṭṭhitā |64.772| tā māliniyo padumuppalacchadā alaṅkatā candanasāravositā anupubbatā tā tava mānase ratā rathe ṭhitā pañjalikā upaṭṭhitā |64.773| kaṇṭhesu te yāni pilandhanāni ca hatthesu pādesu tatheva sīse obhāsayanti dasa sabbato disā abbhuddayaṃ sāradikova bhāṇumā |64.774| vātassa vegena ca sampakampitā bhujesu mālā apilandhanāni ca muñcanti ghosaṃ ruciraṃ suciṃ subhaṃ sabbehi viññūhi susattarūpaṃ |64.775| uyyānabhumyā ca duvaṭṭhito ṭhitā Rathā ca nāgā turiyāni vāsaro tameva devinda pamodayanti vīṇā yathā pokkharapattabāhuhi |64.776| imāsu vīṇāsu bahūsu vaggūsu manuññarūpāsu hadayeritampi taṃ pavajjamānāsu atīva accharā bhamanti kaññā padumesu sikkhitā |64.777| yathā ca gītāni ca vāditāni ca naccāni cimāni samenti ekato athettha naccanti athettha accharā obhāsayanti ubhato va rattiyā |64.778| so modasi turiyagaṇappabodhano mahīyamāno vajirāvudhoriva imāsu vīṇāsu bahūsu vaggūsu manuññarūpāsu hadayeritampi taṃ |64.779| kiṃ tvaṃ pure kammamakāsi attanā manussabhūto purimāya jātiyā uposathaṃ kiṃ va tuvaṃ upāvisi kiṃ dhammacariyaṃ vatamābhirocasi |64.780| nayidaṃ appassa katassa kammuno pubbe suciṇṇassa uposathassa vā Iddhānubhāvo vipulo ayaṃ tava yaṃ devasaṅghaṃ abhirocase bhusaṃ |64.781| dānassa te idaṃ phalaṃ atho sīlassa vā pana atho añjalikammassa tamme akkhāhi pucchito (iti). |64.782| So devaputto attamano moggallānena pucchito pañhaṃ puṭṭho viyākāsi yassa kammassidaṃ phalaṃ |64.783| jitindriyaṃ buddhamanomanikkamaṃ naruttamaṃ kassapamaggapuggalaṃ apāpurantaṃ amatassa dvāraṃ devātidevaṃ satapuññalakkhaṇaṃ |64.784| tamaddasaṃ kuñjaramoghatiṇṇaṃ suvaṇṇasiṅginadabimbasādisaṃ disvāna taṃ khippamahuṃ sucimano tameva disvāna subhāsitaddhajaṃ |64.785| tamannapānaṃ atha vāpi cīvaraṃ suciṃ paṇītaṃ rasasā upetaṃ pupphābhikiṇṇamhi sake nivāsane patiṭṭhapesiṃ sa asaṅgamānaso |64.786| tamannapānena ca cīvarena ca khajjena bhojjena ca sāyanena ca Santappayitvā dipadānamuttamaṃ so saggaso devapure ramāmahaṃ |64.787| etenupāyena imaṃ niraggalaṃ yaññaṃ yajitvā tividhaṃ visuddhaṃ pahāyahaṃ mānussakaṃ samussayaṃ indasamo devapure ramāmahaṃ |64.788| āyuñca vaṇṇañca sukhaṃ balañca paṇītarūpaṃ abhikaṅkhatā muni annañca pānañca bahuṃ susaṅkhataṃ patiṭṭhapetabbamasaṅgamānaso |64.789| imasmiṃ loke parasmiṃ vā pana buddhena seṭṭho ca samo na vijjati āhuneyyānaṃ paramāhutaṃ gato puññatthikānaṃ vipulapphalesinanti. Mahārathavimānaṃ cuddasamaṃ. Uddānaṃ maṇḍūko revatī chatto kakkaṭako dvārapālako dve karaṇīyā dve sūcī tayo nāgā ca dve rathā purisānaṃ pañcamo vaggoti paṭhamo vaggo pavuccatīti. Bhāṇavāraṃ tatiyaṃ. Chaṭṭho pāyāsikavaggo