[78] |78.857| 4 Sovaṇṇamaye pabbatasmiṃ vimānaṃ sabbato pabhaṃ hemajālapaṭicchannaṃ kiṃkaṇikajālakappitaṃ |78.858| aṭṭhaṃsā sukatā thambhā sabbe veḷuriyāmayā ekamekāya aṃsiyā ratanā satta nimmitā |78.859| veḷuriyasuvaṇṇassa phalikārūpiyassa ca masāragallamuttāhi lohitaṅgamaṇīhi ca |78.860| citrā manoramā bhūmi na tatthuddhaṃsate rajo gopāṇase gaṇāpītā kūṭaṃ dhārenti nimmitā |78.861| sopāṇāni ca cattāri nimmitā caturo disā Nānāratanagabbhehi ādiccova virocati |78.862| vedikā catasso tattha vibhattā bhāgaso mitā daddallamānā ābhenti samantā caturo disā |78.863| tasmiṃ vimāne pavare devaputtā mahappabhā atirocasi vaṇṇena udayantova bhāṇumā |78.864| dānassa te idaṃ phalaṃ atho sīlassa vā pana atho añjalikammassa taṃ me akkhāhi pucchitoti. |78.865| So devaputto attamano moggallānena pucchito pañhaṃ puṭṭho viyākāsi yassa kammassidaṃ phalaṃ |78.866| ahaṃ andhakavindasmiṃ buddhassādiccabandhuno vihāraṃ satthuno kāresiṃ pasanno sakehi pāṇihi |78.867| tattha gandhañca mālañca paccayañca vilepanaṃ vihāraṃ satthunodāsiṃ vippasannena cetasā tena mayhaṃ idaṃ laddhaṃ vasaṃ vattemi nandane |78.868| nandane pavare ramme nānādijagaṇāyute ramāmi naccagītehi accharāhi purakkhitoti. Suvaṇṇavimānaṃ catutthaṃ.