[80] |80.881| 6 Disvāna devaṃ paṭipucchi bhikkhu ucce vimānamhi ciraṭṭhitike āmuttahatthābharaṇo yasassī [2]- dibbe vimānamhi yathāpi candimā |80.882| dibbā ca vīṇā pavadanti vaggū aṭṭhaṭṭhakā sikkhitā sādhurūpā dibbā ca kaññā tidasacarā uḷārā naccanti gāyanti pamodayanti |80.883| deviddhipattosi mahānubhāvo manussabhūto kimakāsi puññaṃ kenāsi evañjalitānubhāvo vaṇṇo ca te sabbadisā pabhāsatīti. Pe ... yassa kammassidaṃ phalaṃ |80.885| ahaṃ manussesu manussabhūto saṅgamma rakkhissaṃ paresaṃ dhenuyo tato ca āgā samaṇo mama santike gāvo ca māse agamaṃsu khādituṃ |80.886| dvayajjakiccaṃ ubhayañca kārissaṃ iccevahaṃ bhante tadā vicintayaṃ tato ca saññaṃ paṭiladdhayoniso adāsi bhanteti khipiṃ anantakaṃ |80.887| so māsakhettaṃ turito avāsariṃ purāyaṃ bhañjati yassidaṃ dhanaṃ tato ca kaṇho urago mahāviso aḍaṃsi pāde turitassa me sato |80.888| svāhaṃ aṭṭomhi dukkhena pīḷito bhikkhu ca taṃ muñcitvā anantakaṃ adāsi kummāsaṃ mamānukampāya tato cuto kālamakatomhi devatā Gopālavimānaṃ chaṭṭhaṃ.