[100] |100.134| 3 Naggā dubbaṇṇarūpāsi kīsā dhamanisaṇṭhitā Upphāsuḷike kīsike kā nu tvaṃ idha tiṭṭhasīti. |100.135| Sāhaṃ mattā tuvaṃ tissā sapattī te pure ahuṃ pāpakammaṃ karitvāna petalokaṃ ito gatāti. |100.136| Kinnu kāyena vācāya manasā dukkaṭaṃ kataṃ kissa kammavipākena petalokaṃ ito gatāti. |100.137| Caṇḍī ca pharusā cāsiṃ issukī maccharī saṭhā tāhaṃ duruttaṃ vatvāna petalokaṃ ito gatāti. |100.138| Saccaṃ ahaṃpi jānāmi yathā tvaṃ caṇḍikā ahu aññañca kho taṃ pucchāmi kenāsi paṃsukuṭṭhitā . |100.139| Sīsaṃ nahātā tuvaṃ āsi sucivatthā alaṅkatā ahañca kho [5]- adhimattaṃ samalaṅkatarā tayā |100.140| tassā me pekkhamānāya sāmikena samantayi tato me issā vipulā kodho me samajāyatha |100.141| tato paṃsuṃ gahetvāna paṃsunā taṃ vikīrihaṃ tassa kammavipākena tenamhi paṃsukuṭṭhitāti . |100.142| Saccaṃ ahaṃpi jānāmi paṃsunā maṃ tvaṃ okiri aññañca kho taṃ pucchāmi kena khajjāsi kacchuyāti. |100.143| Bhesajjahārī ubhayo vanantaṃ agamimhase tvaṃ ca bhesajjamāhāri ahañca kapikacchuno |100.144| tassā tyājānamānāya seyyaṃ tyāhaṃ samokiri Tassa kammavipākena tena khajjāmi kacchuyāti. |100.145| Saccaṃ ahaṃpi jānāmi seyyaṃ me tvaṃ samokiri aññañca kho taṃ pucchāmi kenāsi naggiyā tuvanti. |100.146| Sahāyānaṃ samayo āsi ñātīnaṃ samitiṃ ahu tavañca āmantitā āsi sasāmī no ca kho ahaṃ |100.147| tassā tyājānamānāya dussaṃ tyāhaṃ apānudiṃ tassa kammavipākena tenamhi naggiyā ahanti. |100.148| Saccaṃ ahaṃpi jānāmi dussaṃ me tvaṃ apānudi aññañca kho taṃ pucchāmi kenāsi gūthagandhinīti. |100.149| Tava gandhañca mālañca paccagghañca vilepanaṃ gūthakūpe adhāresiṃ taṃ pāpaṃ pakataṃ mayā tassa kammavipākena tenamhi gūthagandhinīti. |100.150| Saccaṃ ahaṃpi jānāmi taṃ pāpaṃ pakataṃ tayā aññañca kho taṃ pucchāmi kenāsi duggatā tuvanti. |100.151| Ubhinnaṃ samakaṃ āsi yaṃ gehe vijjate dhanaṃ santesu deyyadhammesu dīpaṃ nākāsimattano tassa kammavipākena tenamhi duggatā ahanti. |100.152| Tadeva maṃ tvaṃ avaca pāpakammaṃ nisevasi na hi pāpehi kammehi sulabhā hosi suggatiṃ |100.153| vāmato maṃ tvaṃ paccesi athopi maṃ ussuyyati Passa pāpānaṃ kammānaṃ vipāko hoti yādiso. |100.154| Te gharadāsiyo āsuṃ tānevābharaṇānime te aññe parivārenti na bhogā honti sassatā |100.155| idāni bhūtassa pitā āpaṇā gehamehiti appeva te dade kiñci mā su tāva ito gatā . |100.156| Naggā dubbaṇṇarūpāmhi kīsā dhamanisaṇṭhitā kopīnaṃ etaṃ itthīnaṃ mā maṃ bhūtapitāddasa. |100.157| Handa kiṃ [3]- tyāhaṃ dammi kiṃ vā ca te karomahaṃ yena tvaṃ sukhitā assa sabbakāmasamiddhinī. |100.158| Cattāro bhikkhū saṅghato cattāro pana puggalā aṭṭha bhikkhū bhojayitvā mama dakkhiṇamādisi tadāhaṃ sukhitā hessaṃ sabbakāmasamiddhinī. |100.159| Sādhūti sā paṭisutvā bhojayitvā aṭṭha bhikkhavo vatthehicchādayitvāna tassā dakkhiṇamādisi. |100.160| Samanantarānudiṭṭhe vipāko upapajjatha bhojanacchādanapānīyaṃ dakkhiṇāya idaṃ phalaṃ |100.161| tato suddhā sucivasanā kāsikuttamadhārinī vicittavatthābharaṇā sapattiṃ upasaṅkami. |100.162| Abhikkantena vaṇṇena yā tvaṃ tiṭṭhati devate Obhāsentī disā sabbā osadhī viya tārakā |100.163| kena tetādiso vaṇṇo kena te idhamijjhati uppajjanti ca te bhogā ye keci manaso piyā |100.164| pucchāmi taṃ devi mahānubhāve manussabhūtā kimakāsi puññaṃ kenāsi evaṃ jalitānubhāvā vaṇṇo ca te sabbadisā pabhāsatīti. |100.165| Ahaṃ mattā tuvaṃ tissā sapattī te pure ahuṃ pāpakammaṃ karitvāna petalokaṃ ito gatā |100.166| tava dānena dinnena modāmi akutobhayā. Ciraṃ jīvāhi bhagini saha sabbehi ñātibhi asokaṃ virajaṃ ṭhānaṃ āvāsaṃ vasavattīnaṃ |100.167| idha dhammaṃ caritvāna dānaṃ datvāna sobhaṇe. Vineyya maccheramalaṃ samūlaṃ aninditā saggamupesi ṭhānanti. Mattāpetivatthu tatiyaṃ.