[108] |108.324| 11 Ahaṃ pure pabbajitassa bhikkhuno suttaṃ adāsi upagamma yācitā tassa vipāko vipulaṃ phalūpalabbhati bahū ca me uppajjare vatthakoṭiyo. |108.325| Pupphābhikiṇṇaṃ ramitaṃ vimānaṃ anekacittaṃ naranārisevitaṃ sāhaṃ bhuñjāmi ca pārupāmi ca pahūtavittā na ca tāva khīyati. |108.326| Tasseva kammassa vipākamanvyā sukhañca sātañca idhūpalabbhati sāhaṃ gantvā punadeva mānusaṃ Kāhāmi puññāni nayayyaputta manti. |108.327| Satta tuvaṃ vassasatā idhāgatā jiṇṇā ca vuḍḍhā ca tahiṃ bhavissasi sabbeva te kālakatā ca ñātakā tvaṃ tattha gantvāna ito karissasīti. |108.328| Satteva vassāni idhāgatāya me dibbañca sukhañca samappitāya sāhaṃ gantvā punareva mānusaṃ kāhāmi puññāni nayayyaputta manti. |108.329| So taṃ gahetvāna pasayha bāhāyaṃ paccānayitvāna punareva theriṃ sudubbalaṃ vajjesi aññaṃpi janaṃ idhāgataṃ karotha puññāni sukhūpalabbhatīti. |108.330| Diṭṭhā mayā akatena sādhunā petā vihaññanti tatheva mānusā kammañca katvā sukhavedanīyaṃ devā manussā ca sukhe ṭhitā pajāti. Suttapetavatthu ekādasamaṃ.