[112] |112.391| 2 Kuṇḍinagariyo thero sānavāsinivāsiko poṭṭhapādoti nāmena samaṇo bhāvitindriyo. |112.392| Tassa mātā pitā bhātā duggatā yamalokikā pāpakammaṃ karitvāna petalokaṃ ito gatā. |112.393| Te duggatā sūcikaṭṭhā kilantā naggino kisā ottappantā mahattāsā na dessanti kurūrino. |112.394| Tassa bhātā vitaritvā naggo ekapathekako catukuṇḍiko bhavitvāna therassa dassayitumaṃ. |112.395| Thero cāmanasikatvā tuṇhībhūto atikkami so ca viññāpayi theraṃ bhātā petaṃ gato ahaṃ. |112.396| Mātā pitā ca te bhante duggatā yamalokikā Pāpakammaṃ karitvāna petalokaṃ ito gatā |112.397| te duggatā sūcikaṭṭhā kilantā naggino kisā ottappantā mahattāsā na dessanti kurūrino. |112.398| Anukampassu kāruṇiko datvā anvādisāhi no tava dinnena dānena yāpessanti kurūrinoti. |112.399| Thero caritvā piṇḍāya bhikkhū aññe ca dvādasa ekajjhaṃ sannipatiṃsu bhattavissaggakāraṇā. |112.400| Thero sabbepi te āha yathā laddhaṃ dadātha me saṅghabhattaṃ karissāmi anukampāya ñātīnaṃ. |112.401| Niyyādayiṃsu therassa thero saṅghaṃ nimantayi datvā anvādisi thero pitu mātu ca bhātuno idaṃ me ñātīnaṃ hotu sukhitā hontu ñātayo. |112.402| Samanantarānudiṭṭhe bhojanaṃ upapajjatha suciṃ paṇītaṃ sampannaṃ anekarasabyañjanaṃ |112.403| tato uddissati bhātā vaṇṇavā balavā sukhī. Pahūtaṃ bhojanaṃ bhante passa naggamhase mayaṃ tathā bhante parakkamma yathā vatthaṃ labhāmhase. |112.404| Thero saṅkārakūṭato uccinitvāna nantake Pilotikaṃ paṭaṃ katvā saṅghe cātuddise adā. |112.405| Datvā anvādisi thero pitu mātu ca bhātuno idaṃ me ñātīnaṃ hotu sukhitā hontu ñātayo. |112.406| Samanantarānudiṭṭhe vatthāni upapajjiṃsu tato suvatthavasano therassa dassayītumaṃ. |112.407| Vaṇṇavā balavā sukhī yāvatā nandarājassa vijitasmiṃ paṭicchādā tato bahuttarā bhante. |112.408| Vatthānicchādanāni no koseyyakambalīyāni khomakappāsikāni ca vipulā ca mahagghā ca |112.409| te cākāsevalambare te mayaṃ paridahāma yaṃ yaṃ hi manaso piyaṃ tathā bhante parakkāma yathā gehaṃ labhāmase. |112.410| Thero paṇṇakuṭiṃ katvā saṅghe cātuddise adā. Datvā ca uddisi thero pitu mātu ca bhātuno idaṃ me ñātīnaṃ hotu sukhitā hontu ñātayo. |112.411| Samanantarānudiṭṭhe gharāni upapajjiṃsu kūṭāgārā nivesanā vibhattā bhāgaso mitā. |112.412| Na manussesu īdisā yādisā no gharā idha api dibbesu yādisā tādisā no gharā idha Tathā bhante parakkama yathā pānaṃ labhāmase. |112.414| Thero karakaṃ pūretvā saṅghe cātuddise adā. Datvā anvādisi thero pitu mātu ca bhātuno idaṃ me ñātīnaṃ hotu sukhitā hontu ñātayo. |112.415| Samanantarānudiṭṭhe pānīyaṃ upapajjatha gambhīrā caturassā ca pokkharaññā sunimmitā |112.416| sītudakā supatitthā ca sītā appaṭigandhiyā padumuppalasañchannā vārikiñjakkhapūritā. |112.417| Tattha nahātvā pivitvā therassa paṭidassayuṃ pahūtaṃ pānīyaṃ bhante pāpā dukkhaphalanti no |112.418| āhiṇḍamānā khañjāma sakkhare kusakaṇṭake tathā bhante parakkama yathā yānaṃ labhāmase. |112.419| Thero sipāṭikaṃ laddhā saṅghe cātuddise adā. Datvā anvādisi thero pitu mātu ca bhātuno idaṃ me ñātīnaṃ hotu sukhitā hontu ñātayo. |112.420| Samanantarānudiṭṭhe petā rathena māgamuṃ anukampitamha bhadante bhattena chādanena ca |112.421| gharena pānīyadānena yānadānena cūbhayaṃ muniṃ kāruṇikaṃ loke taṃ bhante vanditumāgatāti. Sānuvāsittherapetavatthu dutiyaṃ.