[117] |117.461| 7 Naranārīpurakkhato yuvā rajanīye kāmaguṇehi sobhasi divasaṃ anubhosi kāraṇaṃ kiṃ akāsi purimāya jātiyāti. |117.462| Ahaṃ rājagahe ramme ramaṇīye giribbaje Migaluddo pure āsiṃ lohitapāṇī dāruṇo. |117.463| Avirodhakaresu pāṇīsu puthusattesu paduṭṭhamānaso vicari atidāruṇo sadā parahiṃsāya rato asaññato. |117.464| Tassa me sahāyo suhadayo saddho āsi upāsako so hi maṃ anukampanto nivāresi punappunaṃ |117.465| mākāsi pāpakaṃ kammaṃ mā tāta duggatiṃ agā sace icchasi pecca sukhaṃ virama pāṇavadhaṃ asaṃyamaṃ . |117.466| Tassāhaṃ vacanaṃ sutvā sukhakāmassa hitānukampino nākāsiṃ sakalānusāsaniṃ cirapāpābhirato abuddhimā. |117.467| So maṃ puna bhūrisumedhaso anukampāya saṃyame nivesayi sace divā hanasi pāṇino atha te rattiṃ bhavatu saṃyamo. |117.468| Svāhaṃ divā hanitvāna pāṇino virato rattiṃ ahosi saṃyato rattāhaṃ parihāremi divā khajjāmi duggato. |117.469| Tassa kammassa kusalassa anubhomi rattiṃ amānusiṃ divā paṭihatāva kukkurā upadhāvanti samantā khādituṃ |117.470| ye ca te satatānuyogino dhuvaṃ payuttā sugatassa sāsane maññāmi te amatameva kevalaṃ adhigacchanti padaṃ asaṅkhatanti. Migaluddapetavatthu sattamaṃ.