[118] |118.471| 8 Kūṭāgāre ca pāsāde pallaṅke goṇasaṇṭhite pañcaṅgikena turiyena ramasi suppavādite. |118.472| Tato ratyā vivasāne suriyuggamanaṃ pati apaviṭṭho susānasmiṃ bahuṃ dukkhaṃ nigacchasi. |118.473| Kinnu kāyena vācāya manasā dukkaṭaṃ kataṃ kissa kammavipākena idaṃ dukkhaṃ nigacchasīti. |118.474| Ahaṃ rājagahe ramme ramaṇīye giribbaje migaluddo pure āsiṃ luddo āsiṃ asaññato. |118.475| Tassa me sahāyo suhadayo saddho āsi upāsako tassa kulupako bhikkhu āsi gotamasāvako. |118.476| So hi maṃ anukampanto nivāresi punappunaṃ mākāsi pāpakaṃ kammaṃ mā tāta duggatiṃ agā sace icchasi pecca sukhaṃ virama pāṇavadhaṃ asaṃyamaṃ. |118.477| Tassāhaṃ vacanaṃ sutvā sukhakāmassa hitānukampino nākāsiṃ sakalānusāsaniṃ cirapāpābhirato abuddhimā. |118.478| So maṃ puna bhūrisumedhaso anukampāya saṃyame nivesayi sace divā hanasi pāṇino atha te rattiṃ bhavatu saṃyamo. |118.479| Svāhaṃ divā hanitvā pāṇino virato rattiṃ ahosi saṃyato rattāhaṃ parihāremi divā khajjāmi duggato. Dutiyamigaluddapetavatthu aṭṭhamaṃ.