[127] |127.661| 7 Pubbe katānaṃ kammānaṃ vipāko mathaye manaṃ rūpe sadde rase gandhe phoṭṭhabbe ca manorame. |127.662| Naccaṃ gītaṃ ratiṃ khiḍḍaṃ anubhutvā anappakaṃ uyyāne paricāritvā pavisanto giribbajaṃ. |127.663| Isiṃ sunettamaddakkhi attadantaṃ samāhitaṃ appicchaṃ hirīsampannaṃ uñche pattagate rataṃ. |127.664| Hatthikkhandhato oruyha laddhā bhanteti ca brūvi tassa pattaṃ gahetvāna uccaṃ paggayha khattiyo. |127.665| Thaṇḍile pattaṃ bhinditvā hasamāno apakkami rañño kitavassāhaṃ putto kiṃ maṃ bhikkhu karissasi. |127.666| Tassa kammassa pharusassa vipāko kaṭuko ahu yaṃ rājaputto vedesi nirayamhi samappito. |127.667| Chaḷeva caturāsīti vassāni nahutāni ca bhusaṃ dukkhaṃ nigacchiṭṭho niraye katakibbiso. |127.668| Uttānopi ca paccittha nikujjo vāmadakkhiṇo uddhaṃpādo ṭhito ceva ciraṃ bālo apaccitha. Rājaputtapetavatthu sattamaṃ.