[351] |351.399| 5 Manujassa pamattacārino taṇhā vaḍḍhati māluvā viya so pariplavati hurāhuraṃ phalamicchaṃva vanasmiṃ vānaro. |351.400| Yaṃ esā sahate jammī taṇhā loke visattikā sokā tassa pavaḍḍhanti abhivuṭṭhaṃva vīraṇaṃ. |351.401| Yo cetaṃ sahate jammiṃ taṇhaṃ loke duraccayaṃ sokā tamhā papatanti udabinduva pokkharā. |351.402| Taṃ vo vadāmi bhaddaṃ vo yāvantettha samāgatā Taṇhāya mūlaṃ khaṇatha usīratthova vīraṇaṃ mā vo naḷaṃva sotova māro bhañji punappunaṃ. |351.403| Karotha buddhavacanaṃ khaṇo ve mā upaccagā khaṇātītā hi socanti nirayamhi samappitā. |351.404| Pamādo rajo pamādānupatito rajo appamādena vijjāya abbuhe sallamattanoti. Māluṅkyaputto thero.