[369] |369.518| 1 Yathā dukkhaṃ jarāmaraṇanti paṇḍito aviddasū yattha sitā puthujjanā dukkhaṃ pariññāya satova jhāyati tato ratiṃ paramataraṃ na vindati. |369.519| Yadā dukkhassāvahaniṃ visattikaṃ papañcasaṅghāṭadukkhādhivāhaniṃ taṇhaṃ pahatvāna satova jhāyati tato ratiṃ paramataraṃ na vindati. |369.520| Yadā sivaṃ dvecaturaṅgagāminaṃ Magguttamaṃ sabbakilesasodhanaṃ paññāya phusitvā satova jhāyati tato ratiṃ paramataraṃ na vindati. |369.521| Yadā asokaṃ virajaṃ asaṅkhataṃ santaṃ padaṃ sabbakilesasodhanaṃ bhāveti saññojanabandhanacchidaṃ tato ratiṃ paramataraṃ na vindati. |369.522| Yadā nabhe gajjati meghadundubhi dhārākulā vihaṅgapathe samantato bhikkhu ca pabbhāragatova jhāyati tato ratiṃ paramataraṃ na vindati. |369.523| Yadā nadīnaṃ kusumākulānaṃ vicittavāneyyavaṭaṃsakānaṃ tīre nisinno sumanova jhāyati tato ratiṃ paramataraṃ na vindati. |369.524| Yadā nisīve rahitamhi kānane deve gaḷantamhi nadanti dāṭhino bhikkhu ca pabbhāragatova jhāyati tato ratiṃ paramataraṃ na vindati. Bhūto thero. Uddānaṃ bhūto tathaddaso thero eko khaggavisāṇavā navakamhi nipātamhi gāthāyopi imā navāti. Navakanipāto niṭṭhito. --------------