[470] |470.312| 4 Petāni bhoti puttāni khādamānā tuvaṃ pure tuvaṃ divā ca ratto ca atīva paritappasi. |470.313| Sājja sabbāni khāditvā satta puttāni brāhmaṇi vāsiṭṭhi kena vaṇṇena na bāḷhaṃ paritappasi |470.314| bahūni me puttasatāni ñātisaṅghasatāni ca khāditāni atītaṃse mama tuyhañca brāhmaṇa. |470.315| Sāhaṃ nissaraṇaṃ ñatvā jātiyā maraṇassa ca Na socāmi na rodāmi na cāhaṃ paritappāmi . |470.316| Abbhūtaṃ vata vāsiṭṭhi vācaṃ bhāsasi edisiṃ kassa tvaṃ dhammamaññāya giraṃ bhāsasi edisiṃ. |470.317| Esa brāhmaṇa sambuddho nagaraṃ mithilaṃ pati sabbadukkhappahānāya dhammaṃ desesi pāṇinaṃ. |470.318| Tassāhaṃ brāhmaṇa arahato dhammaṃ sutvā nirūpadhiṃ tattha viññātasaddhammā puttasokaṃ byapānudiṃ. |470.319| So ahaṃpi gamissāmi nagaraṃ mithilaṃ pati appeva maṃ so bhagavā sabbadukkhā pamocaye. |470.320| Addasa brāhmaṇo buddhaṃ vippamuttaṃ nirūpadhiṃ tassa dhammamadesesi muni dukkhassa pāragū |470.321| dukkhaṃ dukkhasamuppādaṃ dukkhassa ca atikkamaṃ ariyaṭṭhaṅgikaṃ maggaṃ dukkhūpasamagāminaṃ. |470.322| Tattha viññātasaddhammo pabbajjaṃ samarocayi sujāto tīhi rattīhi tisso vijjā aphassayi. |470.323| Ehi sārathi gacchāhi rathaṃ nīyādayāhimaṃ ārogyaṃ brāhmaṇiṃ vajja pabbajito dāni brāhmaṇo sujāto tīhi rattīhi tisso vijjā aphassayi. |470.324| (tato ca rathamādāya sahassañcāpi sārathi Ārogyaṃ brāhmaṇiṃ avoca pabbajito dāni brāhmaṇo sujāto tīhi rattīhi tisso vijjā aphassayi .) |470.325| etañcāhaṃ assarathaṃ sahassañcāpi sārathi tevijjaṃ brāhmaṇaṃ sutvā puṇṇapattaṃ dadāmi te. |470.326| Tumheva hotu assaratho sahassañcāpi brāhmaṇi ahaṃpi pabbajissāmi varapaññassa santike. |470.327| Hatthigavassaṃ maṇikuṇḍalañca phītañcimaṃ gehavigataṃ pahāya pitā pabbajito tuyhaṃ bhuñja bhogāni sundari tuvaṃ dāyādikā kule. |470.328| Hatthigavassaṃ maṇikuṇḍalañca rammañcimaṃ gehavigataṃ pahāya pitā pabbajito mayhaṃ puttasokena addhito ahaṃpi pabbajissāmi bhātusokena addhitā |470.329| so te ijjhatu saṅkappo yaṃ tvaṃ patthesi sundari uttiṭṭhapiṇḍo uñcho ca paṃsukūlañca cīvaraṃ etāni abhisambhontī paraloke anāsavā. |470.330| Sikkhamānāya me ayye dibbacakkhuṃ visodhitaṃ pubbenivāsaṃ jānāmi yattha me vusitaṃ pure. Sundarī.