[63] |63.723| 13 Daḷhadhammanisārassa dhanuṃ olubbha tiṭṭhasi khattiyo nusi rājañño ādū luddho vanācaroti. |63.724| Assakādhipatissāhaṃ bhante putto vanecaro nāmaṃ me bhikkhu te brūmi sujāto iti maṃ vidū |63.725| mige gavesamānohaṃ ogāhanto brahāvanaṃ migaṃ gantveva nādakkhiṃ tañca disvā ahaṃ ṭhito (iti). |63.726| Svāgatante mahāpuñña atho te adūrāgataṃ ito udakamādāya pāde pakkhālayassu te |63.727| idaṃpi pāniyaṃ sītaṃ ābhataṃ girigabbharā rājaputta tato pitvā santhatasmiṃ upāvisāti. |63.728| Kalyāṇī vata te vācā savanīyā mahāmuni nelā atthavatī vaggū mantā atthañca bhāsasi |63.729| kā te rati vane viharato isinisabha vadehi puṭṭho tava vacanapathaṃ nisāmayitvā atthadhammapadaṃ samācaremaseti. |63.730| Ahiṃsā sabbapāṇinaṃ kumāramhākaṃ ruccati theyyā ca aticārā ca majjapānā ca ārati |63.731| arati samacariyā ca bāhusaccaṃ kataññutā diṭṭheva dhamme pasaṃsā dhammā ete pasaṃsiyāti |63.732| santike maraṇaṃ tuyhaṃ oraṃ māsehi pañcahi Rājaputta vijānāhi attānaṃ parimocayāti. |63.733| Katamaṃ svāhaṃ janapadaṃ gantvā kiṃ kammaṃ kiñci porisaṃ kāya vā pana vijjāya bhaveyyaṃ ajarāmaroti. |63.734| Na vijjate so padeso kammaṃ vijjā ca porisaṃ yattha gantvā bhave macco rājaputtājarāmaro |63.735| mahaddhanā mahābhogā raṭṭhavantopi khattiyā pahūtadhanadhaññāse na tepi ajarāmarā |63.736| yadi te sutā andhakaveṇḍaputtā sūrā vīrā vikkantappahārino tepi āyukkhayaṃ pattā viddhastā sassatīsamā |63.737| khattiyā brāhmaṇā vessā suddā caṇḍālapukkusā ete caññe ca jātiyā tepi na ajarāmarā |63.738| ye mantaṃ parivattenti chaḷaṅgaṃ brahmacintitaṃ ete caññe ca vijjāya tepi na ajarāmarā |63.739| isayo cāpi ye santā saññatattā tapassino sarīraṃ tepi kālena vijahanti tapassino |63.740| bhāvitattāpi arahanto katakiccā anāsavā nikkhipanti imaṃ dehaṃ puññapāpaparikkhayā (iti). |63.741| Subhāsitā atthavatī gāthāyo te mahāmuni Nijjhattomhi subhaṭṭhena tvañca me saraṇaṃ bhavāti. |63.742| Mā maṃ tvaṃ saraṇaṃ gaccha tameva saraṇaṃ vaja sakyaputtaṃ mahāvīraṃ yamahaṃ saraṇaṃ gatoti. |63.743| Katarasmiṃ so janapade satthā tumhāka mārisa ahampi daṭṭhuṃ gacchissaṃ jinaṃ appaṭipuggalanti. |63.744| Puratthimasmiṃ janapade okkākakulasambhavo satthāpi purisājañño so ca kho parinibbutoti. |63.745| Sace hi buddho tiṭṭheyya satthā tumhāka mārisa yojanāni sahassāni gacche payirupāsituṃ |63.746| yato ca kho parinibbuto satthā tumhāka mārisa parinibbutaṃ mahāvīraṃ gacchāmi saraṇaṃ ahaṃ |63.747| upemi saraṇaṃ buddhaṃ dhammañcāpi anuttaraṃ saṅghañca naradevassa gacchāmi saraṇaṃ ahaṃ |63.748| pāṇātipātā viramāmi khippaṃ loke adinnaṃ parivajjayāmi amajjapo no ca musā bhaṇāmi sakena dārena ca homi tuṭṭhoti. |63.749| Sahassaraṃsīva yathā mahappabho disaṃ yathā bhāti nabhe anukkamaṃ tathappakāro tavāyaṃ mahāratho Samantato yojanasataṃ āyato |63.750| suvaṇṇapaṭṭehi samantamonaṭo urassa muttāhi maṇīhi cittito lekhā suvaṇṇassa ca rūpiyassa ca sobhanti veḷuriyamayā sunimmitā |63.751| sīsañcidaṃ veḷuriyassa nimmitaṃ yugañcidaṃ lohitakāya cittitaṃ yuttā suvaṇṇassa ca rūpiyassa ca sobhanti assāpi cime manojavā |63.752| so tiṭṭhasi hemarathe adhiṭṭhito devānamindova sahassavāhano pucchāmi tāhaṃ yasavantakovidaṃ kathaṃ tayā laddho ayaṃ uḷāroti. |63.753| Sujāto nāmahaṃ bhante rājaputto pure ahuṃ tañca maṃ anukampāya saññamasmiṃ nivesayi |63.754| khīṇāyukañca maṃ ñatvā sarīraṃ pādāsi satthuno (iti). Imaṃ sujāta pūjehi tante atthāya hohīti |63.755| tāhaṃ gandhehi mālehi pūjayitvā samuyyuko pahāya mānusaṃ dehaṃ upapannomhi nandane Cūḷarathavimānaṃ terasamaṃ.