[79] |79.869| 5 Uccamidaṃ maṇithūṇaṃ vimānaṃ samantato dvādasa yojanāni Kūṭāgārā sattasatā uḷārā veḷuriyatthambhā ruciratthatā subhā |79.870| tatthacchasi pivasi khādasi ca dibbā ca vīṇā pavadanti vaggū dibbā rasā kāmaguṇettha pañca nāriyo ca naccanti suvaṇṇachannā |79.871| kena tetādiso vaṇṇo ... Pe ... Vaṇṇo ca te sabbadisā pabhāsatīti. |79.872| So devaputto attamano moggallānena pucchito ... Pe ... yassa kammassidaṃ phalaṃ |79.873| gimhānaṃ pacchime māse patāpante divaṅkare paresaṃ bhatako poso ambārāmaṃ asiñcahaṃ |79.874| atha tenāgamā bhikkhu sārīputtoti vissuto kilantarūpo kāyena akilantopi cetasā |79.875| tañca disvāna āyantaṃ avoca ambasiñcako sādhu taṃ bhante nhāpeyyaṃ yaṃ mamassa sukhāvahaṃ |79.876| tassa me anukampāya nikkhipi pattacīvaraṃ nisīdi rukkhamūlasmiṃ chāyāya ekacīvaro |79.877| tañca acchena vārinā pasannamānaso theraṃ nhāpayiṃ rukkhamūlasmiṃ chāyāya ekacīvaraṃ |79.878| Ambo ca sitto samaṇo nahāpito mayā ca puññaṃ pasutaṃ anappakaṃ iti so pītiyā kāyaṃ sabbaṃ pharati attano |79.879| tadeva ettakaṃ kammaṃ akāsiṃ tāya jātiyā pahāya mānusaṃ dehaṃ upapannomhi nandanaṃ |79.880| nandane pavare ramme nānādijagaṇāyute ramāmi naccagītehi accharāhi purakkhitoti. Ambavimānaṃ pañcamaṃ.