[93] |93.46| 8 Kinnu ummattarūpova lāyitvā haritaṃ tiṇaṃ khāda khādāti lapasi gatasattaṃ jaraggavaṃ. |93.47| Na hi annena pānena mato goṇo samuṭṭhahe tvaṃpi bālo ca dummedho yathā añño ca dummatīti. |93.48| Ime pādā idaṃ sīsaṃ ayaṃ kāyo savāladhi nettā tatheva tiṭṭhanti ayaṃ goṇo samuṭṭhahe |93.49| nayyakassa hatthapādā kāyo sīsañca dissati rudaṃ mattikathūpasmiṃ nanu tvaññeva dummatīti. |93.50| Ādittaṃ vata maṃ santaṃ ghatasittaṃva pāvakaṃ vārinā viya osiñcaṃ sabbaṃ nibbāpaye daraṃ. |93.51| Abbūḷhaṃ vata me sallaṃ sokaṃ hadayanissitaṃ yo me sokaparetassa pitusokaṃ apānudi |93.52| svāhaṃ abbūḷhasallosmiṃ sītibhūtosmi nibbuto na socāmi na rodāmi tava sutvāna māṇava. |93.53| Evaṃ karonti sappaññā ye honti anukampakā nivattayanti sokamhā sujāto pitaraṃ yathāti. Goṇapetavatthu aṭṭhamaṃ.