[96] |96.73| 11 Purato ca setena paleti hatthinā majjhe pana assatarīrathena pacchā ca kaññā sivikāyaṃ niyyāti obhāsayantī dasa sabbato disā. |96.74| Tumhe pana muggarahatthapāṇino rudammukhā bhinnapabhinnagattā Manussabhūtā kimakattha pāpaṃ yenaññamaññassa pivātha lohitaṃ (iti). |96.75| Purato va yo gacchati kuñjarena setena nāgena catukkamena amhākaṃ putto ahu so pajeṭṭhako dānāni datvāna sukhiṃ pamodati. |96.76| Yo so majjhe assatarīrathena catubbhi yuttena suvaggitena amhākaṃ putto ahu majjhimo so amaccharī dānapati virocati. |96.77| Yā sā [4]- pacchā sivikāya niyyāti nārī sapaññā migamandalocanā amhākaṃ dhītā ahu sā kaniṭṭhā bhāgaḍḍhabhāgena sukhī pamodati. |96.78| Ete ca dānāni adaṃsu pubbe pasannacittā samaṇabrāhmaṇānaṃ mayaṃ pana maccharino ahumhā paribhāsakā samaṇabrāhmaṇānaṃ ete ca datvā paricārayanti Mayañca sussāma naḷova dittoti . |96.79| Kiṃ tumhākaṃ bhojanaṃ kiṃ sayanaṃ kathañca yāpetha supāpadhammino pahūtabhogesu anappakesu sukhaṃ virāgāya dukkhajja pattā . |96.80| Aññamaññaṃ vadhitvāna pivāma pubbalohitaṃ bahuṃ pitvā na dātā homa nacchādimhamhase mayaṃ. |96.81| Icceva maccā paridevayanti adāyikā pecca yamassa ṭhāyino ye te viriccā adhigamma bhoge na bhuñjare nāpi karonti puññaṃ. |96.82| Te khuppipāsupagatā parattha pacchā ciraṃ jhāyire ḍayhamānā kammāni katvāna dukkhudrayāni anubhonti dukkhaṃ kaṭukapphalāni. |96.83| Ittaraṃ hi dhanadhaññaṃ ittaraṃ idha jīvitaṃ ittaraṃ ittarato ñatvā dīpaṃ kayirātha paṇḍito. |96.84| Ye te evaṃ pajānanti narā dhammassa kovidā te dāne nappamajjanti sutvā arahataṃ vacoti. Nāgapetavatthu ekādasamaṃ.