[98] |98.95| 1 Naggā dubbaṇṇarūpāsi kīsā dhamanisaṇṭhitā upphāsuḷike kīsike kā nu tvaṃ idha tiṭṭhasīti. |98.96| Ahaṃ bhadante petīmhi duggatā yamalokikā pāpakammaṃ karitvāna petalokamito gatāti. |98.97| Kinnu kāyena vācāya manasā dukkaṭaṃ kataṃ kissa kammavipākena petalokaṃ ito gatāti. |98.98| Anukkampakā mayhaṃ nāhesuṃ bhante pitā mātā ca atha vāpi ñātakā ye maṃ niyojeyyuṃ dadāhi dānaṃ pasannacittā samaṇabrāhmaṇānaṃ. |98.99| Ito ahaṃ vassasatāni pañca yaṃ evarūpā vicarāmi naggā Khudāya taṇhāya ca khajjamānā pāpassa kammassa phalaṃ mamedaṃ. |98.100| Vandāmi taṃ ayya pasannacittā anukampa maṃ vīra mahānubhāva datvā ca me ādisa yāhi kiñci mocehi maṃ duggatiyā bhadanteti. |98.101| Sādhūti so tassā paṭisuṇitvā sārīputto anukampako bhikkhūnaṃ ālopaṃ datvā pāṇimattañca colakaṃ thālakassa ca pānīyaṃ tassā dakkhiṇamādisi |98.102| samanantarā anudiṭṭhe vipāko upapajjatha. Bhojanacchādanapānīyaṃ dakkhiṇāya idaṃ phalaṃ |98.103| tato suddhā sucivasanā kāsikuttamadhārinī vicittavatthābharaṇā sārīputtaṃ upasaṅkami. |98.104| Abhikkantena vaṇṇena yā tvaṃ tiṭṭhasi devate obhāsentī disā sabbā osadhī viya tārakā. |98.105| Kena tetādiso vaṇṇo kena te idhamijjhati uppajjanti ca te bhogā ye keci manaso piyā |98.106| pucchāmi taṃ devi mahānubhāve manussabhūtā kimakāsi puññaṃ kenāpi evaṃ jalitānubhāvā Vaṇṇo ca te sabbadisā pabhāsatīti. |98.107| Uppaṇḍukiṃ kisaṃ chātaṃ naggasamuṭitacchaviṃ muni kāruṇiko loke taṃ maṃ adakkhi dukkhitaṃ |98.108| bhikkhūnaṃ ālopaṃ datvā pāṇimattañca colakaṃ thālakassa ca pānīyaṃ mama dakkhiṇamādisi. |98.109| Ālopassa phalaṃ passa bhattaṃ vassasataṃ dasa bhuñjāmi kāmakāminī anekarasabyañjanaṃ. |98.110| Pāṇimattassa colassa vipākaṃ passa yādisaṃ yāvatā nandarājassa vijitasmiṃ paṭicchadā |98.111| tato bahutarā bhante vatthānicchādanāni me koseyyakambalīyāni khomakappāsikāni ca |98.112| vipulā ca mahagghā ca tepākāseva lambare sāhaṃ taṃ paridahāmi yaṃ yaṃ hi manaso piyaṃ |98.113| thālakassa ca pānīyaṃ vipākaṃ passa yādisaṃ. Gambhīrā caturassā ca pokkharaññā sunimmitā |98.114| setodakā supatitthā sītā appaṭigandhiyā padumuppalasañchannā vārikiñjakkhapūritā |98.115| sāhaṃ ramāmi kīḷāmi modāmi akutobhayā muniṃ kāruṇikaṃ loke bhante vanditumāgatāti. Saṃsāramocakapetavatthu paṭhamaṃ.