[๗๑๗] อุรโคว ตจํ ชิณฺณํ หิตฺวา คจฺฉติ สนฺตนน เอวํ สรีเร นิพฺโภเค เปเต กาลกเต สติ ทยฺหมาโน น ชานาติ ญาตีนํ ปริเทวิตํ ตสฺมา เอตํ น โสจามิ คโต โส ตสฺส ยา คติ ฯ

[๗๑๘] อนพฺภิโต ๔ ตโต อาคา นานุญฺญาโต ๕ อิโต คโต ยถาคโต ตถา คโต ตตฺถ กา ปริเทวนา ทยฺหมาโน น ชานาติ ญาตีนํ ปริเทวิตํ ตสฺมา เอตํ น โสจามิ คโต โส ตสฺส ยา คติ ฯ

[๗๑๙] สเจ โรเท กีสา ๖ อสฺสํ ตสฺสา เม กึ ผลํ สิยา ญาติมิตฺตสุหชฺชานํ ภิยฺโย โน อรตี สิยา ทยฺหมาโน น ชานาติ ญาตีนํ ปริเทวิตํ ตสฺมา เอตํ น โสจามิ คโต โส ตสฺส ยา คติ ฯ

[๗๒๐] ยถาปิ ทารโก จนฺทํ คจฺฉนฺตํ อนุโรทติ เอวํ สมฺปทเมเวตํ โย เปตมนุโสจติ ทยฺหมาโน น ชานาติ ญาตีนํ ปริเทวิตํ ตสฺมา เอตํ น โสจามิ คโต โส ตสฺส ยา คติ ฯ