[๒๔๒๗] อธมฺเมน ตุวํ ชมฺม พฺรหฺมทตฺตสฺส กุชฺฌสิ โย ตฺวํ สปสิ ราชานํ อปรชฺฌิตฺวาน อตฺตโน ๔ ฯ

[๒๔๒๘] ธมฺเมน พฺรหฺมทตฺตสฺส อหํ กุชฺฌามิ พฺราหฺมณ อรกฺขิตา ชานปทา อธมฺมพลินา หตา ฯ รตฺติญฺห โจรา ขาทนฺติ ทิวา ขาทนฺติ ตุณฺฑิยา รฏฺฐสฺมึ กูฏราชสฺส พหุ อธมฺมิโก ชโน ฯ สา นูน ปุน เร ปกฺกา วิกาเล ภตฺตมาหริ ภตฺตหารึ อเปกฺขนฺโต หโต ผาเลน สาลิโย ฯ

[๒๔๒๙] เอวํ หญฺญตุ ปญฺจาโล สงฺคาเม อสินา หโต ยถาหมชฺช ปหโต ขีรญฺจ เม ปวตฺติตํ ฯ

[๒๔๓๐] ยํ ปสุ ขีรํ ฉฑฺเฑติ ปสุ ผาลํ ๒ วิหึสติ ๓ กึ ตตฺถ พฺรหฺมทตฺตสฺส ยํ โน ครหเต ๔ ภวํ ฯ