[379] Yassatthā dūramāyanti amittamapi yācituṃ tassūdarassahaṃ dūto mā me kujjha rathesabha.

[380] Yassa divā ca ratto ca vasamāyanti māṇavā tassūdarassahaṃ dūto mā me kujjha rathesabha.

[381] Dadāmi te brāhmaṇa rohiṇīnaṃ gavaṃ sahassaṃ saha puṅgavena dūto hi dūtassa kathaṃ na dajjaṃ mayampi tasseva bhavāma dūtāti. Dūtajātakaṃ dasamaṃ. Saṅkappavaggo paṭhamo. -------- Tassuddānaṃ usukāravaro tilamuṭṭhi maṇi hayarāja vihaṅgama āsīviso janasandha kahāpaṇavassa puna tiriti puna dūtāvarena dasa. ---------