[634] Gavañce taramānānaṃ jimhaṃ gacchati puṅgavo sabbā gāvī jimhaṃ yanti nette jimhaṃ gate sati.

[635] Evameva manussesu yo hoti seṭṭhasammato so ce adhammaṃ carati pageva itarā pajā sabbaṃ raṭṭhaṃ dukkhaṃ seti rājā ce hoti adhammiko.

[636] Gavañce taramānānaṃ ujuṃ gacchati puṅgavo sabbā gāvī ujuṃ yanti nette ujuṃ gate sati.

[637] Evameva manussesu yo hoti seṭṭhasammato so cepi dhammaṃ carati pageva itarā pajā Sabbaṃ raṭṭhaṃ sukhaṃ seti rājā ce hoti dhammikoti. Rājovādajātakaṃ catutthaṃ.