[646] Na te pīṭhamadāsimha na pānaṃ napi bhojanaṃ brahmacārī khamassu me etaṃ passāmi accayaṃ.

[647] Nevābhisajjāmi nacāpi kuppe nacāpi me appiyamāsi kiñci athopi me āsi manovitakko etādiso nūna kulassa dhammo.

[648] Esasmākaṃ kule dhammo pitupitāmaho sadā āsanaṃ udakaṃ pajjaṃ sabbetaṃ nipadāmase.

[649] Esasmākaṃ kule dhammo pitupitāmaho sadā sakkaccaṃ upatiṭṭhāma uttamaṃ viya ñātakanti. Pīṭhajātakaṃ sattamaṃ.