[1180] Ādittasmiṃ agārasmiṃ yaṃ nīharati bhājanaṃ Taṃ tassa hoti atthāya no ca yaṃ tattha ḍayhati.

[1181] Evamādipito loko jarāya maraṇena ca nīharetheva dānena dinnaṃ hoti sunībhataṃ .

[1182] Yo dhammaladdhassa dadāti dānaṃ uṭṭhānaviriyādhigatassa jantu atikkamma so vetaraṇiṃ yamassa dibbāni ṭhānāni upeti macco.

[1183] Dānañca yuddhañca samānamāhu appāpi santā bahuke jinanti appampi ce saddahāno dadāti teneva so hoti sukhī parattha.