[1443] Apacantāpi icchanti santo laddhāna bhojanaṃ kimeva tvaṃ pacamāno yaṃ na dajjā na taṃ samaṃ.

[1444] Maccherā ca pamādā ca evaṃ dānaṃ na diyyati puññaṃ ākaṅkhamānena deyyaṃ hoti vijānatā.

[1445] Yasseva bhīto na dadāti (maccharī) tadevādadato bhayaṃ jighacchā ca pipāsā ca yassa bhāyati maccharī tameva bālaṃ phusati asmiṃ loke paramhi ca.

[1446] Tasmā vineyya maccheraṃ dajjā dānaṃ malābhibhū puññaṃ hi paralokasmiṃ patiṭṭhā hoti pāṇinaṃ.