[1942] Mahesī rucino bhariyā ānītā paṭhamaṃ ahaṃ dasa vassasahassāni yaṃ maṃ suruci ānayi . Sāhaṃ brāhmaṇa rājānaṃ vedehaṃ mithilaggahaṃ nābhijānāmi kāyena vācāya uda cetasā suruciṃ atimaññittha āvi vā yadivā raho. Etena saccavajjena putto uppajjataṃ ise musā me bhaṇamānāya muddhā phalatu sattadhā.

[1943] Bhattu manāpā sassu piyā mātā pitā ca sassuro te maṃ brahme vinetāro yāva aṭṭhaṃsu jīvitaṃ. Sāhaṃ ahiṃsāratinī kāmasā dhammacārinī sakkaccaṃ te upaṭṭhāsiṃ rattindivamatanditā. Etena saccavajjena putto uppajjataṃ ise musā me bhaṇamānāya muddhā phalatu sattadhā.

[1944] Soḷasitthīsahassāni sahabhariyāni brāhmaṇa tāsu issā vā kodho vā nāhu mayhaṃ kudācanaṃ. Hitena tāsaṃ nandāmi na ca me kāci appiyā attānaṃvānukampāmi sadā sabbā sapattiyo. Etena saccavajjena putto upajjataṃ ise musā me bhaṇamānāya muddhā phalatu sattadhā.

[1945] Dāse kammakare pose yecaññe anujīvino posemi sahadhammena sadā pamuditindriyā. Etena saccavajjena putto uppajjataṃ ise musā me bhaṇamānāya muddhā phalatu sattadhā.