[2352] Rajjañca paṭipannasmā ādhipaccaṃ sucīrata mahantaṃ pattumicchāmi vijetuṃ paṭhaviṃ imaṃ. Dhammena no adhammena adhammo me na ruccati kiccova dhammo carito rañño hoti sucīrata. Idha cevāninditā yena pecca yena aninditā yasaṃ devamanussesu yena pappomu brāhmaṇa. Yohaṃ atthañca dhammañca kattumicchāmi brāhmaṇa taṃ tvaṃ atthañca dhammañca brāhmaṇakkhāhi pucchito.

[2353] Nāññatra vidhurā rāja tadakkhātumarahati yaṃ tvaṃ atthañca dhammañca kattumicchasi khattiya.

[2354] Ehi kho pahito gaccha vidhurassa upantikaṃ nikkhañcimaṃ suvaṇṇassa haraṃ gaccha sucīrata abhihāraṃ imaṃ dajja atthadhammānusiṭṭhiyā.

[2355] Svādhippāgā bhāradvājo vidhurassa upantikaṃ tamaddasa mahābrahmā asamānaṃ sake ghare.