[2406] Kā vedhamānā girikandarāyaṃ ekā tuvaṃ tiṭṭhasi sañcitūru puṭṭhāsi me pāṇipameyyamajjhe akkhāhi me nāmañca bandhave ca. Obhāsayaṃ vanaṃ rammaṃ sīhabyagghanisevitaṃ kā vā tvamasi kalyāṇī kassa vā tvaṃ sumajjhime abhivādemi taṃ bhadde dānavāhaṃ namatthu te.

[2407] Yo putto kāsirājassa sotthisenoti taṃ vidū tassāhaṃ sambulā bhariyā evaṃ jānāhi dānava Abhivādemi bhaddante sambulāhaṃ namatthu te. Vedehaputto bhaddante vane vasati āturo tamahaṃ rogasammattaṃ ekā ekaṃ upaṭṭhahaṃ . Ahañca vanamuñchāya madhumaṃsaṃ migābilaṃ yadāharāmi taṃbhakkho tassa nūnajja nādhati.

[2408] Kiṃ vane rājaputtena āturena karissasi sambule pariciṇṇena ahaṃ bhattā bhavāmi te. Sokaṭṭāya durattāya kiṃ rūpaṃ vijjate mama aññaṃ pariyesa bhaddante abhirūpataraṃ mayā. Ehimaṃ girimāruyha bhariyā mayhaṃ catussatā tāsaṃ tvaṃ pavarā hoti sabbakāmasamiddhinī. Nanu tārakavaṇṇābhe yaṅkiñci manasicchasi sabbantaṃ pacuraṃ mayhaṃ ramassujja mayā saha. No ce tuvaṃ maheseyyaṃ sambule kārayissasi alaṃ tvaṃ pātarāsāya pañhe bhakkhā bhavissasi. Tañca sattajaṭo luddo kaḷāro purisādako vane nāthaṃ apassantiṃ sambulaṃ aggahī bhuje. Adhipannā pisācena luddenāmisacakkhunā sā ca sattuvasampattā patimevānusocati. Na me idaṃ tathā dukkhaṃ yaṃ maṃ khādeyya rakkhaso Yañca me ayyaputtassa mano hessati aññathā. Na santi devā pavasanti nūna na hi nūna santi idha lokapālā sahasā karontānamasaññatānaṃ na hi nūna santi paṭisedhitāro.

[2409] Itthīnamesā pavarā yasassinī santā samā aggirivuggatejā tañce tuvaṃ rakkhasādesi kaññaṃ muddhā ca hi sattadhā te phaleyya mā tvaṃ dahi muñca patibbatāya .