[2419] Appamādo amataṃpadaṃ pamādo maccuno padaṃ appamattā na mīyanti ye pamattā yathā matā. Madā pamādo jāyetha pamādā jāyate khayo khayā padosā jāyanti mā mado bharatūsabha. Bahū hi khattiyā jīnā atthaṃ raṭṭhaṃ pamādino athopi gāmino gāmā anāgārā agārino. Khattiyassa pamattassa raṭṭhasmiṃ raṭṭhavaḍḍhana sabbe bhogā vinassanti rañño taṃ vuccate aghaṃ. Nesa dhammo mahārāja ativelaṃ pamajjasi iddhaṃ phītaṃ janapadaṃ corā viddhaṃsayanti naṃ. Na te puttā bhavissanti na hiraññaṃ na dhāniyaṃ raṭṭhe vilumpamānamhi sabbabhogehi jiyyasi. Sabbabhogaparijiṇṇaṃ rājānaṃ vāpi khattiyaṃ ñātimittā suhajjā ca na taṃ maññanti mantiyaṃ . Hatthārohā anīkaṭṭhā rathikā pattikārakā tamevamupajīvantā na taṃ maññanti mantiyaṃ . Asaṃvihitakammantaṃ bālaṃ dummantimantinaṃ sirī jahati dummedhaṃ jiṇṇaṃva urago tacaṃ. Susaṃvihitakammantaṃ kāluṭṭhāyiṃ atanditaṃ sabbe bhogābhivaḍḍhanti gāvo sausabhāmiva upassutiṃ mahārāja raṭṭhe janapade cara tattha disvā ca sutvā ca tato taṃ paṭipajjasi.

[2420] Evaṃ vedetu pañcālo saṅgāme saramappito yathāhamajja vedemi kaṇṭakena samappito.

[2421] Jiṇṇo dubbalacakkhūsi na rūpaṃ sādhu passasi kiṃ tattha brahmadattassa yantaṃ maggeyya kaṇṭako.

[2422] Bahvettha brahmadattassa yohaṃ maggasmi brāhmaṇa Arakkhitā jānapadā adhammabalinā hatā. Rattiñhi corā khādanti divā khādanti tuṇḍiyā raṭṭhasmiṃ kūṭarājassa bahu adhammiko jano. Etādise bhaye jāte bhayaṭṭā tāta māṇavā nillenakāni kubbanti vane āhatva kaṇṭakaṃ.