[562] Satta me rohitā macchā udakā thalamubbhatā idaṃ brāhmaṇa me atthi etaṃ bhutvā vane vasa.

[563] Dussa me khettapālassa rattiṃ bhattaṃ apābhataṃ Maṃsasūlā ca dve godhā ekañca dadhivārakaṃ idaṃ brāhmaṇa me atthi etaṃ bhutvā vane vasa.

[564] Ambapakkaṃ dakaṃ sītaṃ sītacchāyaṃ manoramaṃ idaṃ brāhmaṇa me atthi etaṃ bhutvā vane vasa.

[565] Na sasassa tilā atthi na muggā napi taṇḍulā iminā agginā pakkaṃ mamaṃ bhutvā vane vasāti. Sasapaṇḍitajātakaṃ chaṭṭhaṃ.