[717] Uragova tacaṃ jiṇṇaṃ hitvā gacchati santanuṃ evaṃ sarīre nibbhoge pete kālakate sati dayhamāno na jānāti ñātīnaṃ paridevitaṃ tasmā etaṃ na socāmi gato so tassa yā gati.

[718] Anabbhito tato āgā nānuññāto ito gato yathāgato tathā gato tattha kā paridevanā dayhamāno na jānāti ñātīnaṃ paridevitaṃ tasmā etaṃ na socāmi gato so tassa yā gati.

[719] Sace rode kīsā assaṃ tassā me kiṃ phalaṃ siyā Ñātimittasuhajjānaṃ bhiyyo no aratī siyā dayhamāno na jānāti ñātīnaṃ paridevitaṃ tasmā etaṃ na socāmi gato so tassa yā gati.

[720] Yathāpi dārako candaṃ gacchantaṃ anurodati evaṃ sampadamevetaṃ yo petamanusocati dayhamāno na jānāti ñātīnaṃ paridevitaṃ tasmā etaṃ na socāmi gato so tassa yā gati.