[877] Ahampi kho taṃ jānāmi netaṃ tumhesu vijjati santi loke alakkhikā saṅgharanti bahuṃ dhanaṃ ahaṃ devo ca me bhātā ubho naṃ vidhamāmase.

[878] Kā nu dibbena vaṇṇena paṭhabyā supatiṭṭhitā kā vā tvaṃ kassa vā dhītā kathaṃ jānemu taṃ mayaṃ.

[879] Mahārājassahaṃ dhītā dhataraṭṭhasirīmato ahaṃ sirī ca lakkhī ca bhūripaññāti maṃ vidū okāsaṃ yācito dehi vasemu tava santike.

[880] Kiṃsīle kiṃsamācāre purise nivise tuvaṃ puṭṭhā me lakkhi akkhāhi yathā jānemu taṃ mayaṃ.