[1477] Mittāni ve yassa bhavanti santo saṃvissatthā avisaṃvādakassa na mittadubbhī saṃvibhāgī dhanena mittesu ve sotthānaṃ tadāhu.

[1478] Yassa bhariyā tulyavayā samaggā anubbatā dhammakāmā pajātā koliniyā sīlavatī patibbatā dāresu ve sotthānaṃ tadāhu.

[1479] Yassa rājā bhūtapatī yasassī jānāti soceyya parakkamañca advejjhatā suhadayaṃ mamanti rājūsu ve sotthānaṃ tadāhu.

[1480] Annañca pānañca dadāti saddho mālañca gandhañca vilepanañca pasannacitto anumodamāno saggesu ve sotthānaṃ tadāhu.