[1504] Suṇohi mayhaṃ vacanaṃ janinda atthena juṇhamhi idhānupatto na brāhmaṇe addhike tiṭṭhamāne gantabbamāhu dvipadānaseṭṭha .

[1505] Suṇomi tiṭṭhāmi vadehi brahme yenāpi atthena idhānupatto kaṃ vā tvamatthaṃ mayi patthayāno idhāgamā brahme tadiṅgha brūhi.

[1506] Dadāhi me gāmavarāni pañca dāsīsataṃ satta gavaṃsatāni parosahassañca suvaṇṇanikkhe bhariyā ca me sādisī dve dadāhi.

[1507] Tapo nu te brāhmaṇa bhiṃsarūpo mantā nu te brāhmaṇa cittarūpā yakkhā nu te assavā santi keci atthaṃ vā me abhijānāsi kattaṃ.